Accident : लग्नाहून परतताना मृत्यूने गाठले; भीषण अपघातात ५ मित्रांचा करुण अंत

five friends dead Haryana road accident : लग्नहून घराकडे परत येत असताना ५ मित्रांचा अपघातात दुर्दैवी मृत्यू झालाय. हरियाणातील सोनीपत जिल्ह्यातील गोहाना येथे हा भयंकर अपघात झाला. चालकाचे नियंत्रण सुटल्यामुळे स्कॉर्पिओ कार झाडावर आदळली अन् एका क्षणात होत्याचं नव्हते झाले. हा अपघात इतका भीषण होता की ५ मित्रांचा जागीच मृत्यू झाला. या अपघातात २ जण गंभीर जखमी झाले आहेत. मिळालेल्या माहितीनुसार, अपघातात मृत झालेले तरूण रोहतक जिल्ह्यातील असल्याचे समजतेय. सर्व मित्र भावड गावातील लग्न आटोपून घराकडे परत येत होते. पण त्याचवेळी काळाने घाला घातला. या अपघातामुळे परिसरात शोककळा पसरली आहे.

पोलिसांनी दिलेल्या माहितीनुसार, शुक्रवारी सोनीपत जिल्ह्यातील घाडवाल ते भावड रस्त्यावर स्कॉर्पिओ (HR 98 B 9988) चालकाचा ताबा सुटला. त्यामुळे भरधाव वेगात असलेली कार रस्त्याच्या कडेला असलेल्या झाडाला धडकली. या कारमध्ये ७ मित्र प्रवास करत होते. त्यामधील ५ जणांचा जागीच मृत्यू झाला. अपघात इतका भयंकर होता की गाडीचा चक्काचूर झाला. अपघातानंतर स्थानिकांनी तात्काळ जखमींना रूग्णालयात दाखल केले. या अपघातात गोलू, अंकुश, दीपक, सतबीर आणि सागर यांचा मृत्यू झाला.

५ तरुणांचा मृत्यू

घाडवाल ते भावड येथे झालेल्या भीषण अपघातामधील ५ ही मृत मित्रांचे वय २५ ते २८ वर्ष असल्याचा अंदाज आहे. गोलू हा विवाहित होता. तर इतर ४ मृत हे अविवाहित होते. अपघातामध्ये २ जण जखमी झाले आहेत. त्यामधील एक गंभीर जखमी असून त्याच्यावर खानपूरमधील रूग्णालयात उपचार करण्यात येत आहेत. या अपघातमधील दुसरा जखमी झालेल्या मोहित याची प्रकृती स्थिर आहे.

कुटुंबावर दुखाचा डोंगर -

५ तरूणांच्या अकाली मृत्यूची बातमी समजताच खिडवली, घुसकानी आणि आजूबाजूच्या गावांमध्ये शोककळा पसरली आहे. कुटुंबावर दुखाचा डोंगर कोसळलाय. दरम्यान, पोलिसांनी या अपघाताची नोंद केली असून तपास सुरू केला आहे. हा अपघात का झाला? याचा तपास पोलिसांकडून कऱण्यात येत आहे. रोहतकमधील गावातील ७ तरूण भावड येथे लग्नाला गेले होते. लग्नानंतर ते घराकडे येत असताना भीषण अपघात झाला. यामध्ये पाच जणांचा मृत्यू झाला, तर दोन जण जखमी झाले आहेत. त्यामधील एकाची प्रकृती गंभीर असल्याचे पोलीस अधिकारी धरमवीर यांनी सांगितलेय.