Rahul Ganghi: मतं चोरुन मोदी पंतप्रधान बनले; राहुल गांधींचा आरोप

राहुल गांधींनी मतचोरीच्या मुद्द्यावरुन निवडणूक आयोगाला चांगलंच घेरलंय.. तर आयोगानेही राहुल गांधींना शपथपत्र पाठवलंय. त्यावरुन आता नवं रणकंदन सुरुय. राहुल गांधींच्या आरोपांचा काय परिणाम होऊ शकतो? पाहूयात या स्पेशल रिपोर्टमध्ये. निवडणुकीतील मतचोरीच्या मुद्द्यावर राहुल गांधींनी सुरु केलेला आरोपांचा सिलसिला दुसऱ्या दिवशीही सुरुच आहे.. कर्नाटकच्या महादेवपुरा लोकसभा मतदारसंघातील 1 लाख 250 बोगस मतदारांसंदर्भातील आरोपांवरुन निवडणूक आयोगाने राहुल गांधींना शपथपत्र पाठवून पुरावे सादर करण्याचं आव्हान दिलंय. तर मोदींवर निशाणा साधत राहुल गांधींनी डिजिटल डेटाची मागणी करुन निवडणूक आयोगाला आणखीच कात्रीत पकडलंय.

महाराष्ट्र विधानसभेच्या निवडणुकीत तब्बल 1 कोटी मतदारांची वाढ झाली. तर अखेरच्या 1 तासात राज्यात तब्बल 76 लाख मतदार वाढल्याचं समोर आलं. या आकडेवारीवर संशय व्यक्त करत कॉंग्रेसनं शोध घ्यायला सुरवात केली..आणि या घोटाळ्याची मोडस ऑपरेंडीच राहुल गांधींनी उघड केलीय. निवडणूक आयोगाने शपथपत्राचं आव्हान दिल्यानंतर राहुल गांधींनी आयोगावर प्रश्नांची सरबत्ती केलीय.

राहुल गांधींनी महाराष्ट्र आणि कर्नाटकमधील घोटाळा उघड केलाय खरा.. मात्र यामुळे निवडणुक आयोगाच्या हाती आयतं कोलित मिळाल्याने बिहारच्या निवडणूकीत विरोधक बॅकफुटवर जाण्याची शक्यता वर्तवण्यात येतेय. बनावट मतदार, चुकीचा पत्ता, नकली फोटो,तसंच एकाच पत्त्यावर अनेक बोगस मतदार असल्याचं राहुल गांधींनी दाखवून दिलंय.राहुल गांधीच्या या आरोपानं एकच राळ उडवून दिलीय. या प्रकरणी निवडणूक आयोग राहुल गांधींना डिजिटल डेटा आणि सीसीटीव्ही फुटेज देऊन शंकेचं निरसन करणार की केवळ पुरावे सादर करण्यास सांगून याकडे दुर्लक्ष करणार, याकडे अवघ्या देशाचं लक्ष लागलंय