Ebola Virus: जीवघेण्या व्हायरसची भारतात एंट्री; लक्षणे दिसताच अहमदाबादमध्ये एकजण आयसोलेट

काही दिवसांपासून आफ्रिकेतील काही देशांमध्ये इबोला विषाणूने धुमाकूळ घातला आहे. या जीवघेण्या अशा इबोला विषाणूने संपूर्ण जगाची चिंता वाढवली आहे. दरम्यान भारतामध्येही इबोला विषाणूच्या संसर्गासारखी लक्षणे असलेला एक रुग्ण सापडला आहे. यामुळे भारतातील आरोग्य यंत्रणा अलर्ट झाली आहे.

गुजरातमधील अहमदाबाद येथे एका ३७ वर्षीय व्यावसायिकामध्ये इबोलाच्या संसर्गासारखी लक्षणे आढळून आली. त्यानंतर या व्यावसायिकाला आयसोलेशन वॉर्डमध्ये भरती करण्यात आले आहे. यासह त्याच्या संपर्कातील ३ व्यक्तींनाही अहमदाबादमधील वेगवेगळ्या रुग्णालयात भरती करण्यात आलंय.

सदर व्यावसायिक या महिन्याच्या सुरुवातीला काँगो येथून भारतात परतला होता. सर्वात आधी तो मुंबईत आला होता. त्यानंतर पाच दिवस घरी राहिल्यानंतर तो सिल्व्हासा आणि दमण येथे गेला होता. त्यानंतर २२ तारखेला बडोद्याला गेला. तोपर्यंत त्याला प्रकृतीत कोणताच बदल जाणवला नाही. परंतु २६ मे रोजी त्याला सर्दी तापाची लक्षणे जाणवून लागली. त्याची ट्रॅव्हल हिस्ट्री पाहिल्यानंतर डॉक्टांनी त्याला अधिक उपचारांसाठी अहमदाबाद येथे पाठवले.

याबाबत अधिक माहिती देताना गुजरातचे आरोग्यमंत्री प्रफुल्ल पानशेरिया म्हणाले की, रुग्णाला देखरेखीखाली ठेवण्यात आले आहे. तसेच त्याच्या रक्ताचे नमुने तपासणीसाठी पाठवले आहेत. आता या तपासणीचा अहवाल आल्यानंतर सदर रुग्णाला झालेल्या संसर्गाबाबत योग्य ती माहिती समोर येईल. मात्र आरोग्य विभागाने भारतात इबोला विषाणूच्या संसर्गाच्या कुठल्याही प्रकरणाला दुजोरा दिलेला नाही. मात्र तरीही योग्य ती खबरदारी घेतली जात आहे.