Pooja Khedkar: पूजा खेडकरला कधीही होऊ शकते अटक? हायकोर्टाने अटकपूर्व जामीन अर्ज फेटाळला

माजी प्रोबेशनरी आयएएस अधिकारी पूजा खेडकरच्या अडचणीत वाढ झाली आहे. पूजा खेडकरला अटक होण्याची शक्यता आहे. यूपीएससी परीक्षेमध्ये फसवणूक आणि ओबीसी आणि अपंग कोट्याचा चुकीच्या पद्धतीने लाभ घेतल्याप्रकरणी पूजा खेडकरविरोधात दाखल करण्यात आलेल्या फौजदारी खटल्यासंदर्भात दिल्ली हायकोर्टात आज सुनावणी झाली. हायकोर्टाने पूजा खेडकरला अटकपूर्व जामीन देण्यास नकार दिला.

पूजा खेडकरने जामीनासाठी दाखल केलेल्या याचिकेवर सुनावणी करताना दिल्ली हायकोर्टाचे न्यायमूर्ती चंद्र धारी सिंह यांनी सांगितले की, पूजा खेडकरची जामीनासाठी दाखल केलेली याचिका फेटाळण्यात आली आहे. अटकेपासूनचे अंतरिम संरक्षण काढून टाकण्यात आले आहे. खेडकर यांच्यावर प्रथमदर्शनी भक्कम केस आहे. अशा परिस्थितीमध्ये या कटाचा उलगडा होण्यासाठी तपासाची गरज आहे. घटनात्मक संस्था तसेच समाजाची फसवणूक करण्याचे हे अनोखे प्रकरण आहे.'

पूजा खेडकरवर यूपीएससी परीक्षा २०२२ च्या अर्जामध्ये आरक्षणाचा लाभ घेण्यासाठी चुकीची माहिती दिल्याचा आरोप आहे. दिल्ली पोलिसांचे वकील आणि तक्रारदार युनियन लोकसेवा आयोगाच्या वकिलांनी पूजा खेडकरच्या अटकपूर्व जामिनाच्या अर्जाला विरोध केला. याप्रकरणाच्या सुनावणीदरम्यान यूपीएससीच्या वतीने ज्येष्ठ वकील नरेश कौशिक आणि अधिवक्ता वर्धमान कौशिक न्यायालयामध्ये हजर होते.

यूपीएससीने जुलैमध्ये पूजा खेडकरवर कारवाई करण्यास सुरूवात केली. यामध्ये बनावट ओळख दाखवून नागरी सेवा परीक्षा क्रॅक करण्याचा प्रयत्न केल्याप्रकरणी फौजदारी गुन्हा दाखल करण्याचाही समावेश आहे. दिल्ली पोलिसांनी भारतीय दंड संहिता, माहिती तंत्रज्ञान कायदा आणि अपंग व्यक्तींचे हक्क कायद्याच्या तरतुदींनुसार पूजा खेडकरविरोधात गुन्हा नोंदवला. पण पूजा खेडकरने तिच्यावर करण्यात आलेले सर्व आरोप फेटाळून लावले.