ladki bahin yojana : लाडकी बहीण योजनेमुळे महिलांमध्ये दारूचे सेवन वाढलं; काँग्रेसच्या बड्या नेत्याचं वक्तव्य चर्चेत,VIDEO

काँग्रेसच्या बड्या नेत्याच्या वक्तव्यामुळे लाडकी बहीण योजना पुन्हा चर्चेत आली आहे. मध्य प्रदेश काँग्रेसचे प्रदेशाध्यक्ष जीतू पटवारी यांनी सरकारवर जोरदार हल्लाबोल केला आहे. मध्य प्रदेशातील महिला सर्वाधिक दारूचे सेवन करतात. लाडकी बहीण योजनेच्या नावावर मत मागितले.. आता त्याच लाडक्या बहिणी नशेच्या आहारी गेल्या आहेत. देशात सर्वाधिक दारुचा खप हा मध्य प्रदेशात होतो, असं म्हणत काँग्रेस नेते जीतू पटवारी यांनी टीका केली.

जीतू पटवारी यांनी पुढे म्हटलं की, 'ड्रग्स प्रकरणात मध्य प्रदेशने आता पंजाबलाही मागे टाकलं आहे'. मध्य प्रदेशातील परिस्थितीला पटवारी यांनी मुख्यमंत्री मोहन यादव आणि माजी मुख्यमंत्री शिवराज सिंह चौहान यांना जबाबदार ठरवलं.

'तुमचा मुलगा बेरोजगार आहे. तो नशा करतोय. यासाठी भाजप, मुख्यमंत्री मोहन यादव, माजी मुख्यमंत्री शिवराज सिंह चौहान दोषी आहेत. संपूर्ण देशात मध्य प्रदेशातील महिला सर्वाधिक दारूचे सेवन करतात, असा आरोप काँग्रेस नेते पटवारी यांनी केला.

जीतू पटवारी यांनी पुढे म्हटलं की, सर्वाधिक दारुचा खप हा मध्य प्रदेशमध्ये होतो. ड्रग्सचा बेकायदेशीर व्यवसायही मध्य प्रदेशात वाढू लागलाय. मध्य प्रदेशात सर्वाधिक कुपोषित आणि गरीब देखील आहेत, असेही ते पुढे म्हणाले.

भाजपचं काँग्रेसला प्रत्युत्तर

काँग्रेस प्रदेशाध्यक्ष जीतू पटवारी यांच्या वक्तव्याचा भाजपने समाचार घेतला. भाजप प्रवक्ते अजय सिंह यादव यांनी म्हटलं की, 'जीतू पटवारी मध्य प्रदेशच्या महिला दारुचे सेवन करत असल्याचे सांगून त्यांचा अपमान करत आहेत. अशा व्यक्तीला काँग्रेसने प्रदेशाध्यक्ष पद सोपवलं आहे. त्यांनी महिलांचा मोठा अपमान केला आहे. काँग्रेसने त्यांच्यावर कारवाई करावी, अन्यथा मध्य प्रदेशातील महिला त्यांना कधीही माफ करणार नाही'.