Boat Accident : ५०० जणांना घेऊन जाणारी बोट उलटली, १४८ जणांचा मृत्यू, अनेकजण बेपत्ता

Deadly Boat Fire in Congo Kills 148 : डेमोक्रेटिक रिपब्लिक ऑफ कांगोमध्ये मोठी दुर्घटना घडली आहे. ५०० लोकांना घेऊन जाणाऱ्या लाकडी बोटीला नदीमध्येच आग लागली. आग इतकी भयावह झाली की लाकडी नाव नदीत उलटी झाली. या दुर्घटनेत आतापर्यंत १४८ जणांचा मृत्यू झाला आहे. १०० जणांना वाचवण्यात यश आले आहे. पण अद्याप अनेकजण बेपत्ता आहे, त्यांचा शोध घेतला जात आहे. ही दुर्देवी घटना मबंडाका या शहराजवळ घडली. बोट दुर्घटनेमुळे कांगोमध्ये एकच खळबळ उडाली आहे. या दुर्घटनेने पुन्हा एकदा काँगोतील जलवाहतूक सुरक्षिततेचा प्रश्न ऐरणीवर आणला आहे.

मंगळवारी रात्री काँगो नदीत ही भीषण नाव दुर्घटना घडली होती. या दुर्घटनेत १०० हून अधिकजण अद्याप बेपत्ता आहे. ५०० प्रवाशांना घेऊन जाणारी नाव नदीत उलट्यामुळे ही दुर्दैवी घटना घडली, अशी माहिती स्थानिक अधिकाऱ्यांनी दिली. मटानकुमु बंदरातून ही लाकडी नाव 'एचबी काँगोलो'ला निघाली होती, मबंडाका शहराजवळ नावेला आग लागली आणि खळबळ उडाली अन् नाव पलटी झाली.

स्वयंपाक करत असताना बोटीला आग लागली, त्यामुळे हा अपघात घडला. आगीमुळे घाबरलेल्या प्रवाशांनी नदीत उड्या मारल्या. पण अनेकांना पोहता येत नसल्याने त्यांचा मृत्यू झाला, अशी माहिती एका स्थानिक अधिकाऱ्याने दिली. या दुर्घटनेत वाचलेल्या अनेक प्रवाशांना गंभीर भाजलेल्या अवस्थेत स्थानिक रुग्णालयात दाखल करण्यात आले आहे. त्यांच्यावर उपचार सुरू आहेत. बेपत्ता प्रवाशांचा शोध घेतला जात असल्याचेही अधिकाऱ्याने सांगितले.

रेड क्रॉस आणि स्थानिक प्रशासनाच्या मदतीने बेपत्ता लोकांचा शोध घेतला जात आहे. पण अपुऱ्या संसाधनांमुळे आणि नदीच्या आव्हानात्मक परिस्थितीमुळे बचाव कार्यात अडथळे येत आहेत. दरम्यान, काँगोमध्ये अशा दुर्घटना वारंवार घडतात. जुनी लाकडी नाव आणि जादा प्रवासी क्षमतेमुळे सुरक्षितता धोक्यात येतेय. गेल्या काही वर्षांत अशा अपघातांमुळे शेकडो लोकांचा मृत्यू झाला आहे.