सारखा गावभर फिरत राहतोस; वडील मुलावर संतापले, बारावीच्या विद्यार्थ्याने आयुष्य संपवलं

मध्य प्रदेशच्या सिंगरौली जिल्ह्यातून धक्कादायक घटना घडली आहे. वडील ओरडल्याने मुलाने आयुष्य संपवल्याची खळबळजनक घटना घडल्याचे समोर आलं आहे. या विद्यार्थ्याच्या शरीराचे रेल्वे ट्रॅकवर दोन तुकडे सापडले. त्याच्या मृत्यूने कुटुंबावर दु:खाचा डोंगर कोसळला आहे. पोलिसांनी मुलाचा मृतदेह पोस्टमार्टमला पाठवून पुढील तपासाला सुरुवात केली आहे.

विद्यार्थ्याने सोमवारी दुपारी आत्महत्या केल्याची माहिती मिळतेय. त्याने बरगवा रेल्वे स्टेशनजवळ मालगाडीसमोर उडी मारून आयुष्य संपवलं. इयत्ता बारावीमध्ये शिकणारा हा विद्यार्थी मनिहारी गावात राहणारा होता. सन्नी गौड बैसवार असे या विद्यार्थ्याचे नाव आहे.

सन्नीने आज सकाळी अभ्यास न केल्याने त्याचे वडील ओरडले. वडील ओरडल्याने सन्नी कोणालाही न सांगता घरातून निघून गेला. मात्र, सन्नी आत्महत्येसारखं पाऊल उचलेल, असे कोणालाही वाटत नव्हते.

सन्नीचा मृतदेह पोस्टमार्टमसाठी रुग्णालयात पाठवण्यात आला आहे. पोलिसांनी दिलेल्या माहितीनुसार, प्राथमिकदृष्ट्या सन्नीने आत्महत्या केल्याचं दिसून येत आहे. तर या प्रकरणाचा पुढील तपास सुरू केला आहे. या प्रकरणानंतर त्याच्या नातेवाईकांचे जबाब नोंदवण्याचे काम पोलिसांकडून सुरू आहे. परीक्षेच्या तणावामुळे देखील आत्महत्या केली असावी, असाही संशय व्यक्त करण्यात येत आहे. आत्महत्येने सन्नी राहत असलेल्या परिसरात शोककळा पसरली आहे.

सन्नीच्या आत्महत्येनंतर परिसरातील नागरिकांनी हळहळ व्यक्त केली. पालकांनी त्यांच्या मुलांवर अनावश्यक दबाव टाकू नये, अशाही प्रतिक्रिया नागरिकांकडून उमटत आहेत. विद्यार्थ्याच्या आत्महत्येनंतर मुलांवर वाढणारा परीक्षेचा तणाव गंभीर विषय असून या विषयावर समाजातील लोकांनी लक्ष देण्याची गरज असल्याचाही भावना स्थानिकांकडून व्यक्त केल्या जात आहेत. सन्नीच्या मृत्यूनंतर त्यांच्या कुटुंबाला मानसिक धक्का बसला आहे.