महामार्गावर भीषण अपघात! दोन बस समोरासमोर धडकल्या; ३५ जणांचा मृत्यू

सीरियाची राजधानी आणि पूर्वेकडील 'देर एझ-झोर' प्रांताला जोडणाऱ्या महामार्गावर भीषण अपघात झाला आहे. दोन बसेसची समोरासमोर धडक होऊन झालेल्या अपघातात ३५ जणांचा मृत्यू झालाय. तर अनेकजण जखमी झालेत. 'साना' (SANA) या वृत्तसंस्थेने आरोग्य मंत्रालयाच्या एका अधिकाऱ्याच्या हवाल्याने वृत्त दिले की, वाळवंटातील महामार्गावर प्रवासी बस आणि गृह मंत्रालयाची बस यांच्यात झालेल्या धडकेत सुमारे ३० लोक जखमी झालेत. वृत्तानुसार घटनास्थळी सुरू असलेल्या मोहिमेत सीरियन लष्कराची हेलिकॉप्टर्सही सहभागी होती.

गृह मंत्रालयाने दिली माहिती

देशातील सरकारी वृत्तसंस्था 'साना'चा (सीरियन अरब न्यूज एजन्सी) हवाला देत या वृत्तात म्हटले आहे की, अपघातस्थळी हेलिकॉप्टर्स पाठवण्यात आली आहेत, जेणेकरून जखमींना बाहेर काढून त्यांना होम्स लष्करी रुग्णालयात हलवता येईल. सुरक्षा आणि पायाभूत सुविधांशी संबंधित आव्हाने आहेत, पण ज्या रस्त्यावर हा अपघात झाला तिथे मोठ्या प्रमाणात रहदारी असते.

एका बसमधून सुरक्षा कर्मचारी प्रवास करत होते, तर दुसरी बस नागरिकांना घेऊन जात होती. आपत्ती व्यवस्थापन आणि आपत्कालीन प्रतिसाद मंत्री राएद अल-सालेह यांनी सांगितले की, या वर्षीच्या जानेवारीपासून देशात सुमारे २,००० अपघात झाले आहेत.

खराब रस्त्यांमुळे अपघात

अहवालांनुसार राज्यातील रस्त्यांची खराब स्थिती आहे. खड्डेमय रस्ते झाले आहेत आणि अतिरेक्यांच्या अधूनमधून होणाऱ्या कारवायांमुळे पाल्मिरा आणि अल-सुखना यांच्या दरम्यानच्या मार्गाची स्थिती खूप खराब झाली आहे. अनेक वर्षांपासून येथे रहदारीसाठी व्यत्यय येत आहे. मध्य सीरियाचा मोठा भाग आता सरकारच्या नियंत्रणाखाली असला, तरी या भागात अस्थिरता कायम आहे.

गेल्या दशकापासून सुरू असलेल्या यादवीमुळे देशातील वाहतूक पायाभूत सुविधांची अवस्था अत्यंत दयनीय झाली आहे. प्रमुख शहरांना जोडणारे महामार्ग अनेक वर्षांची उपेक्षा, हवाई हल्ले आणि देखभालीचा अभाव यामुळे रस्त्यांना खाचखळगी पडली आहेत. परिणामी, प्रत्यक्ष संघर्ष सुरू नसतानाही तिथे प्रवास करणे धोकादायक बनलंय.