BJP Leader Shot : भाजप नेत्यावर दिवसाढवळ्या धाडधाड गोळ्या झाडल्या, ५ जण घरात घुसलं अन्...

BJP leader Bablu Yadav firing news in Bhagalpur : विधानसभा निवडणुकीच्या तोंडावर बिहारमधील भागलपूरमधून एक धक्कादायक घटना समोर आली. भाजप नेते विवेकानंद प्रसाद उर्फ बबलू यादव यांच्यावर गोळ्या झाडण्यात आल्या. पाच जण अचानक घरात घुसले अन् धाडधाड गोळ्या झाडल्या. बरारी पोलीस स्टेशन हद्दीतील टीएनबी लॉ कॉलेज लेनमध्ये शुक्रवारी ही घटना घडली. भागलपूरचे डीएसपी अजय कमार चौधरी यांनी शनिवारी याबाबतची माहिती दिली.

बिहारमधील भागलपूरमध्ये भाजप नेते विवेकानंद प्रसाद उर्फ ​​बबलू यादव यांच्यावर कुख्यात गुन्हेगार सूरज तांती यांनी गोळ्या झाडल्या. कुख्यात हल्लेखोर त्याच्या चार साथीदारांसह तिलकमांझी चौकाजवळील टीएनबी लॉ कॉलेज रोडवरील त्याच्या निवासस्थानी जाऊन गोळ्या झाडल्या.पोलिसांनी एका आरोपीला अटक केली असून इतर ४ जणांचा शोध घेतला जात आहे. विधानसभा निवडणुका सुरू असतानाच ही घटना घडल्यामुळे बिहारमध्ये एकच खळबळ उडाली आहे.

स्थानिकांनी याबाबत सांगितले की, भाजप नेते बबलू यादव आपल्या घराबाहेर फिरत होते. त्यावेळी आरोपी सूरज तांती यांनी धाडधाड गोळ्या झाडल्या. या हल्ल्यात बबलू यादव गंभीर जखमी झाले. या घटनेनंतर स्थानिकांनी यादवला मायागंज रुग्णालयात तात्काळ उपचारासाठी दाखल केले. सध्या त्यांच्यावर उपचार सुरू आहेत. प्राथमिक तपासात जुन्या वादातून हा हल्ला झाल्याचे दिसून येत आहे.

पोलिस काय म्हणाले ?

निवडणुकीच्या पार्श्वभूमीवर बिहारमध्ये भाजप नेत्यावर गोळीबार झाल्यानंतर खळबळ उडाली. पोलिसांकडून या घटनेची नोंद घेतली असून तपास सुरू केला आहे. पोलिसांनी या घटनेचे सीसीटीव्ही फुटेज ताब्यात घेतले आहे. डीएसपी चौधरी यांनी ही घटना जुन्या वादातून झाल्याचे सांगितले. ते म्हणाले की, काही दिवसांपूर्वी स्थानिक फळ विक्रेते दिवानंद आणि सूरज तांती यांच्यात भांडण झाले होते. त्या भांडणादरम्यान बबलू यादवने पोलिसांना माहिती दिली होती. पोलिसांनीएखाला ताब्यात घेतले होते. याच रागातून सूरज तांती यांनी हा हल्ला केला.