Train Accident: जोडप्याचे भांडण मिटवायला गेले असता भयंकर घडलं, ट्रेनच्या धडकेत तिघांचा मृत्यू

राजस्थानच्या बिकानेर जिल्ह्यात रविवारी भीषण रेल्वे अपघाताची घटना घडली. या रेल्वे अपघातात ३ जणांचा मृत्यू झाला आणि एक जण गंभीर जखमी झाला आहे. रेल्वे रुळांवर भांडणाऱ्या एका जोडप्याला वाचवण्याचा प्रयत्न करत असताना दोन तरुणांनाही रेल्वेची धडक बसली. या अपघातामध्ये तिघांचा जागीच मृत्यू झाला तर एक गंभीर जखमी असून त्याच्यावर रुग्णालयात उपचार सुरू आहे.

मिळालेल्या माहितीनुसार, बिकानेरच्या जेएन व्यास कॉलनी पोलीि ठाण्याच्या हद्दीतील घरसीसर रेल्वे रुळावर हा अपघात झाला. पोलिसांनी सांगितले की, एक जोडपे रेल्वे रुळावर भांडत होते. त्यांना वाचवण्यासाठी दोन वाटसरूंनी रुळांवर जाऊन ते सोडवण्याचा प्रयत्न केला. पण त्याचवेळी अचानक एक ट्रेन आली आणि त्या चौघांनाही रेल्वेने धडक दिली. एका मृताची ओळख पटली तर दोन जणांची अद्याप ओळख पटली नाही.

या अपघातात तीन जणांचा जागीच मृत्यू झाला तर एक जण गंभीर जखमी झाला. या घटनेनंतर घटनास्थळी ट्रेन थांबवण्यात आली. घटनेची माहिती मिळताच, रेल्वे पोलिस आणि स्थानिक पोलिसांची पथके घटनास्थळी दाखल झाली. जखमीला तातडीने रुग्णालयात दाखल करण्यात आले.

मृतांपैकी एकाची ओळख बिहारमधील दरभंगा येथील रहिवासी संजीत मोची म्हणून पटली आहे. इतर दोन पीडितांची ओळख अद्याप पटलेली नाही. पोलिस जखमी व्यक्तीची ओळख पटवण्याचे कामही करत आहेत. पोलिस या प्रकरणाचा तपास करत असून अपघाताच्या सर्व पैलूंविषयी माहिती गोळा करत आहेत. या अपघातामुळे घटनास्थळी गोंधळ उडाला. दिवाळीच्या दिवशी तिघांचा मृत्यू झाल्याने हळहळ व्यक्त केली जात आहे.