Shocking: ५ वर्षांच्या चिमुकल्याची हत्या, मृतदेहाचे तुकडे करून गोणीत भरले, नंतर...

बिहारमध्ये झालेल्या एका भयंकर घटनेने संपूर्ण परिसर हादरला आहे. जहानाबाद जिल्ह्यातील तेहता पोलीस स्टेशनअंतर्गत सारेन गावात बुधवारी रात्री पाच वर्षीय मुलाची निर्घृण हत्या करण्यात आली. आर्यन कुमार या मुलाचा धारदार शस्त्राने वार करून खून करण्यात आला. त्याचा विद्रूप मृतदेह एका गोणीत सापडल्याने नागरिकांमध्ये संताप आणि भीतीचे वातावरण निर्माण झाले आहे.

मिळालेल्या माहितीनुसार, आर्यन बुधवारी संध्याकाळी 5:30 मिनिटांपर्यंत घरीच होता. त्यानंतर त्याला घराबाहेर खेळायला पाठवण्यात आले. परंतु तो नंतर परतला नाही. अंधार पडूनही तो घरी न आल्याने कुटुंबीयांनी त्याचा शोध सुरू केला. शोधादरम्यान ते आपल्या शेजारी राहणाऱ्या ईश्वरी यादवच्या घराच्या मागे गेले असता त्यांना एक गोणी दिसली. त्यांनी ते उघडले असता आत आर्यनचा विद्रूप मृतदेह आढळला. मृतदेहावर धारदार हत्याराने केलेले वार स्पष्ट दिसत होते. ज्यामुळे ही हत्या अत्यंत क्रूर पद्धतीने करण्यात आल्याचे उघड झाले.

घटनेची माहिती मिळताच स्थानिक पोलिस अधिकारी, सीडीपीओ आणि गावातील इतर अधिकारी घटनास्थळी दाखल झाले. प्राथमिक तपासात समोर आले आहे की काही दिवसांपूर्वी आर्यनच्या कुटुंबाचा त्यांच्या शेजारी असलेल्या ईश्वरी यादव यांच्या कुटुंबाशी काही वाद झाला होता. या कारणावरून ही हत्या झाल्याची शक्यता पोलिस तपासत आहेत. या घटनेनंतर ईश्वरी यादवचे संपूर्ण कुटुंब घरातून फरार झाले असून, पोलिसांनी त्यांच्या शोधासाठी विशेष पथक तयार केले आहे.

पोलीस स्टेशनचे प्रभारी अधिकारी पंकज कुमार यांनी सांगितले की प्रकरणाचा सर्व अंगांनी तपास सुरू आहे. मुलाच्या मृतदेहाचा पंचनामा करून तो पोस्टमार्टमसाठी पाठवण्यात आला आहे. या अमानुष घटनेमुळे सारेन गाव तसेच आसपासच्या भागात तीव्र तणावाचे वातावरण निर्माण झाले आहे, तर गावकऱ्यांनी आरोपींना तातडीने अटक करण्याची मागणी केली आहे.