Shocking: टोकाचं भांडण! गरोदर बायकोला अमानुष मारहाण करत जागीच संपवलं, छतावरून उडी मारून नवरा फरार

बिहारच्या जमुई जिल्ह्यातील गिधौर पोलीस स्टेशन हद्दीतील गांगरा पंचायतीच्या गांधी आश्रम परिसरात एका पतीने स्वतःच्या गर्भवती पत्नीची निर्घृण हत्या केल्याने खळबळ उडाली आहे. सरिता देवी (२५) असे मृत महिलेचे नाव असून, ती गांधी आश्रमातील रहिवासी मनो रावत यांची सून आहे. वैयक्तिक वादातून झालेल्या या घटनेने परिसरात संतापाचे वातावरण निर्माण झाले आहे.

माहितीनुसार, बुधवारी दुपारी सरिता देवी आणि तिचा पती शुभम कुमार यांच्यात पुन्हा वाद झाला. यापूर्वीही या दाम्पत्यामध्ये सातत्याने भांडण होत असल्याची शेजाऱ्यांकडून माहिती मिळत आहे. दुपारी चार वाजण्याच्या सुमारास शुभमने पत्नीला खोलीत कोंडून ठेवले आणि प्रचंड मारहाण केल्यानंतर धारदार शस्त्राने तिचा गळा चिरत तिची हत्या केली. ही घटना घडल्यानंतर कुटुंबीय काही समजत नव्हते. तेवढ्यात शुभमने छतावरून उडी मारून घरातून पलायन केले.

या घटनेनंतर गिधौर पोलिसांनी घटनास्थळी धाव घेतली आणि मृतदेह ताब्यात घेऊन पोस्टमार्टमसाठी पाठवला. सरिता देवीचा भाऊ सागर कुमार यांनी सांगितले की, २०२२ मध्ये तिचे लग्न शुभम कुमारशी झाले होते आणि त्यांना एक वर्षाचा मुलगा आहे. लग्नानंतरपासूनच शुभम सतत सरितावर शारीरिक अत्याचार करत होता.

दरम्यान, स्टेशन हाऊस ऑफिसर दीनानाथ सिंह यांनी सांगितले की, प्राथमिक चौकशीत पतीने पत्नीची धारदार शस्त्राने हत्या केल्याचे स्पष्ट झाले असून, सध्या मृताच्या कुटुंबीयांची जबाब नोंदवली जात आहे. पोलिसांनी आरोपी शुभम कुमारचा शोध सुरू केला आहे.