Belagavi News: रायबागमध्ये घडलं विचित्र; बापानं १९ वर्षीय जिवंत मुलीचं घातलं श्राद्ध; जेवणाला गावाला बोलवलं

वडिलांनी चक्क जिवंत मुलीचे श्राद्ध घातल्याची घटना बेळगाव जिल्ह्यामधील रायबाग तालुक्यात घडली. इतकेच नाही तर श्राद्धच्या जेवणासाठी गावातील लोकांना सुद्धा बोलवलं. हा सर्व विचित्र प्रकार पाहून गावकरी स्तब्ध झाले, नेमकं काय घडलं? लेक बापासाठी परी असते, मग एका बापाने आपल्याच मुलीचे जिवंतपणी का श्राद्ध का घातलं असा प्रश्न अनेकांना पडला.

नागराळ गावातील सुष्मिता शिवगौडा पाटील नावाची एक तरुणी त्याच गावातील विठ्ठल बस्तावडे नावाच्या पुरुषासोबत पळून गेली होती. मुलीच्या या कृत्यामुळे घराण्याचा नावलौकिक डागळला. या रागापोटी वडील शिवगौडा पाटील यांनी मुलीची तिथी आयोजित करून कुटुंबीयांसह पै पाहुणे व गावकऱ्यांना मुलीच्या नावाने श्राद्धाचे जेवण घातले.

इतकेच करून पित्याचा राग शांत झाला नाही तर त्यांनी गावात ठिकठिकाणी श्रद्धांजलीचे फलक लावून मुलीला श्रद्धांजली अर्पण केली. रायबाग पोलीस स्थानकाच्या हद्दीत ही घटना घडली आहे. या घटनेची पंचक्रोशीत जोरदार चर्चा सुरू आहे. विठ्ठल हा तहसील कार्यालयात ग्रामसेवक म्हणून कार्यरत आहे. सुष्मिता आणि विठ्ठल यांचे एकमेकांवर प्रेम होते. घरचे मंडळी प्रेमाला विरोध करतील. त्यामुळे त्यांनी पळून जाण्याचा निर्णय घेतला.

या घटनेमुळे तिच्या वडिलांच्या स्वाभिमानाला तडा गेला. त्याचा राग त्यांना आला होता. दरम्यान सुष्मिताच्या वडिलांनी आधी तिचा शोध घेतला. सुष्मिता बेपत्ता झाली असल्याची तक्रार देखील शिवगौड यांनी रायबाग पोलीस ठाण्यात दाखल केली. मात्र मुलीने पळून जाऊन घराची मान आणि स्वाभिमान मोडला यामुळे शिवगौड यांनी प्रचंड संताप आला. त्यानंतर आपले मन कठोर करत त्यांनी सुष्मिता जिवंत असतानाही तिचे ‘श्राद्ध’ घातले.

शिवगौड पाटील यांनी गावकऱ्यांना आणि नातेवाईकांना बोलावून सुष्मिताचा फोटो ठेवून पूजन केले. त्यानंतर एखाद्या मृत व्यक्तीला श्रद्धांजली अर्पण करावी, अशा पद्धतीने श्रद्धांजली अर्पण केली. पूण श्राद्ध विधी केले. या विधीत त्यांनी कुटुंबातील सर्व नातेसंबंध तुटल्याचं जाहीर केलं.