Sydney BMW Crash: पोटात ८ महिन्याचं बाळ, भरधाव कारने गर्भवतीला उडवले, एका क्षणात दोघांचाही मृत्यू

Indian IT analyst Samnvita Dhareswar Sydney accident news : ऑस्ट्रेलियातील सिडनीमध्ये प्रत्येकाच्या काळजाचा थरकाप उडवणारा अपघात झाला. आठ महिन्याच्या गर्भवती महिलेला भरधाव वेगात आलेल्या BMW कारने जोरात उडवले. या धडकेत आई अन् बाळाचा जागेवरच मृत्यू झाला. समन्विता धारेश्वर असं मयत महिलेचं नाव असून ती मुळची भारतीय आहे. ३३ वर्षाची समन्विता नवऱ्यासोबत सिडनीमध्ये रस्ता पार करत होती. त्यावेळी BMW कारने जोरात धडक दिली अन् क्षणात होत्याचे नव्हते झाले.

३३ वर्षांची समन्विता सिडनीमध्ये नवरा आणि तीन वर्षांच्या मुलासोबत फिरत होती. दुसऱ्या बाळाचा जन्म काही दिवसांत होणार होता. पण त्यांच्यावर काळाने घाला केला. रस्ता ओलांडत असताना कारने जोरात धडक दिली. त्यामध्ये त्यांचा आणि पोटातील बाळाचा जागेवरच मृत्यू झाला. या घटनेनंतर परिसरात एकच खळबळ उडाली. पोलिसांकडून या प्रकरणात गुन्हा दाखल केला असून चौकशी करण्यात येत आहे. दरम्यान, मृत समन्विता धारेश्वर या अलस्को युनिफॉर्म्स या कंपनीत IT सिस्टीम विश्लेषक म्हणून कार्यरत होत्या.

सिडनी पोलिसांनी या घटनेची नोंद केली आहे. पोलिसांनी मीडियाला दिलेल्या माहितीनुसार, सिडनीत धारेश्वर कुटुंब रस्ता पार करत होते. त्यामुळे एक किया कार थांबली होती. पण त्याचवेळी भरधाव वेगात आलेल्या बीएमडब्ल्यूने किया कारला भीषण धडक दिली. ही धडक इतकी भयंकर होती की किया कार अतिशय वेगात पुढे गेली अन् ८ महिन्याची गर्भवती असणाऱ्या समन्विताला धडकली. या अपघातामुळे ३३ वर्षांची भारतीय समन्विता यांचा जागेवरच मृत्यू झाला अन् पोटात असणाऱ्या ८ महिन्याच्या बाळानेही श्वास थांबवला. परिसरात एका क्षणात हळहळ अन् स्मशान शांतता पसरली.

सिडनी पोलिसांनी तात्काळ घटनास्थळी धाव घेतली. पोलिसांनी या प्रकरणी बीएमडब्ल्यू चालवणारा १९ वर्षीय ऑस्ट्रेलियन मुलाच्या विरोधात गुन्हा दाखल केला. निष्काळजीपणे वाहन चालवून मृत्यूला कारणीभूत ठरणे आणि गर्भाचा मृत्यू घडवणे असे आरोप ठेवण्यात आले आहेत. आरोपीची कसून चौकशी करण्यात येत आहे. ८ महिन्याच्या बाळाचा गर्भातच मृत्यू झाल्याने सिडनीमध्ये हळहळ व्यक्त करण्यात येत आहे.