Earthquake News: आसाम हादरलं! ५.८ रिश्टर स्केल तीव्रतेच्या भूकंपाने गुवाहाटीमध्ये धावपळ

भूकंपाच्या धक्क्याने आसाम पुन्हा हादरले. आसामच्या गुवाहाटीमध्ये ५. रिश्टर स्केल तीव्रतेचे भूकंपाचे धक्के बसले. आसामच्या उदलगुरी सेक्टर परिसरात राहणाऱ्या नागरिकांना भूकंपाचे धक्के जाणवले. त्यामुळे घाबरलेल्या नागरिकांनी तात्काळ घराबाहेर धाव घेतली. सध्या परिसरात भीतीचे वातावरण आहे.

मिळालेल्या माहितीनुसार, आसामच्या काही भागांमध्ये रविवारी सायंकाळी ४.४१ वाजताच्या सुमारास भूकंपाचे धक्के जाणवले. आसामच्या उत्तर पूर्व भागामध्ये हे भूकंपाचे धक्के बसले. या भूकंपाच्या धक्क्यांची तीव्रता ५.८ रिश्टर स्केल इतकी होती. या भूकंपाचे केंद्रबिंदू उदलगुरी जिल्ह्यात होते. भूकंपाची खोली ५ किमी इतकी नोंदवली गेली. या भूकंपामुळे कोणतीही जीवितहानी किंवा मालमत्तेचे नुकसान झालेले नाही अशी माहिती अधिकाऱ्यांनी दिली.

गुवाहाटी शहरातील अनेक परिसरात भूकंपाचे धक्के जाणवले. जमीन हादरल्यामुळे नागरिक घाबरले आणि त्यांनी घराबाहेर धाव घेतली. स्थानिक नागरिकांनी सांगितले की, भूकंपाचे धक्के जाणवत असताना ते थांबणारच नाही असे वाटत होते. असं वाटत होते की आता घराचं छत कोसळेल'

आसामचे माजी मुख्यमंत्री सर्बानंद सोनोवाल यांनी सोशल मीडिया प्लॅटफॉर्म एक्सवर भूकंपाबाबत पोस्ट केली आहे. या पोस्टमध्ये त्यांनी लिहिले की, 'आसाममध्ये भूकंपाचे धक्के जाणवले. सर्वांच्या सुरक्षिततेसाठी आणि उत्तम आरोग्यासाठी प्रार्थना.' भूकंपाचे धक्के जाणवल्यानंतर आसाममधील नागरिकांनी सोशल मीडियावर आपले अनुभव शेअर केले. दरम्यान, काही दिवसांपूर्वी आसामच्या सोनितपूरमध्ये ३.२ रिश्टर स्केल तीव्रतेचे भूकंपाचे धक्के जाणवले होते.