पायलटने 'जाणूनबुजून इंधन स्विच बंद केलं'? एअर इंडिया विमान अपघाताप्रकरणी इटालियन वृत्तपत्राचा मोठा दावा

अजित पवार यांच्या विमान अपघाताप्रकरणी संशय व्यक्त केला जात असतानाच देशातील मोठ्या एअर इंडियाच्या विमान अपघाताबाबत मोठा खुलासा झाला आहे.अहमदाबादमध्ये झालेल्या विमान अपघाताबाबत एका इटालियन वृत्तपत्राने आपल्या अहवालात दावा केला आहे की, एअर इंडिया फ्लाइट १७१ पायलटच्या अॅक्शनमुळे क्रॅश झाले असं भारतीय तपासकर्ते आपल्या अहवालात म्हणू शकतात.

वृत्तपत्राने पाश्चात्य विमान वाहतूक संस्थांमधील सूत्रांचा हवाला देत म्हटलंय की, भारतीय तपासकर्ते त्यांच्या अंतिम अहवालात एअर इंडिया फ्लाइट १७१ का क्रॅश झाले हे उघड करू शकतात. विमान कोसळण्याचे कारण एका पायलटनं 'जाणूनबुजून' विमानाचे इंधन स्विच बंद केले होते.

पायलटनं "जाणूनबुजून" इंधन स्विच बंद केला

इटालियन वृत्तपत्र कोरीएर डेला सेरा यांनी पाश्चात्य विमान वाहतूक एजन्सींमधील सूत्रांचा हवाला देत म्हटलं आहे की, एअर इंडिया फ्लाइट १७१ क्रॅश होण्यामागे कारण म्हणजे वैमानिकाने 'जाणूनबुजून' इंधन स्विच बंद केला होता. कॉकपिट व्हॉइस रेकॉर्डिंगच्या तपासणीवर आणि विमानात कोणतेही तांत्रिक दोष आढळले नाहीत, या वस्तुस्थितीवर आधारित हे निष्कर्ष आहेत.

२६० लोकांचा मृत्यू झाला होता

दरम्यान या दाव्याप्रकरणी भारताच्या विमान अपघात तपास ब्युरो (AAIB) आणि नागरी उड्डाण मंत्रालयाशी संपर्क होऊ शकला नाहीये. २ जून रोजी, एअर इंडियाचे बोईंग ७८७-८ ड्रीमलायनर विमानाचा (फ्लाइट १७१) अपघात घडला होता. अहमदाबाद विमानतळावरून उड्डाण घेतल्यानंतर काही वेळातच हे विमान कोसळले. या अपघातात २६० लोकांचा मृत्यू झाला होता. दोन्ही इंजिनांचा जोर कमी झाल्यानंतर ३२ सेकंदांनी विमान वैद्यकीय विद्यार्थ्यांच्या वसतिगृहावर कोसळले होते.