विद्यानंद बापट हल्ला प्रकरणात मोठी अपडेट! मारहाण करणारा संतोष चव्हाण सराईत गुन्हेगार; गुन्ह्यांची कुंडली आली बाहेर

विद्यानंद बापट यांना मारहाण प्रकरणी पोलिसांनी मोठी कारवाई करत हल्लेखोराला बेड्या ठोकण्यात आल्या आहेत. पोलिसांकडून आरोपी संतोष चव्हाण यांची कसून चौकशी करण्यात येत असून त्यातून धक्कादायक माहिती समोर आलीय. विद्यानंद बापट यांच्यावर हल्ला करणारा संतोष चव्हाणची गु्न्हेगारी कुंडली बाहेर आलीय. गणेशोत्सवातील डीजे आणि ध्वनीप्रदूषणाच्या मुद्द्यावरून बापट यांनी घेतलेल्या भूमिकेच्या पार्श्वभूमीवर चव्हाण याने हल्ला केला का, याचा तपास पोलिसांकडून केला जात आहे? मात्र हल्ल्यामागील नेमके कारण अद्याप स्पष्ट झालेले नाहीये.

पाच ते सहा गुन्हे दाखल

संतोष चव्हाण हा राऊतवाडी परिसरात राहणारा आहे. पुणे पोलिसांच्या गुन्हे शाखेने संतोष चव्हाणला अटक केलीय. दरम्यान पोलिसांच्या माहितीनुसार चव्हाणविरोधात पुणे शहरात आधीच पाच ते सहा गुन्हे दाखल असल्याची माहिती समोर आलीय. मारामारी करणे कट रचने यासारख्या गंभीर गुन्ह्यात पोलिसांनी याआधीच त्याला ताब्यात घेतलं होतं.

तीन वर्षांपूर्वी संतोष चव्हाणने वडिलांनाही मारहाण केली होती. तेव्हापासून वडिलांनी त्याच्यासोबतचा संपर्कही तोडला होता. त्यामुळे बापट यांच्यावरील हल्ल्याच्या पार्श्वभूमीवर चव्हाणची पूर्वीची गुन्हेगारी नोंदही पोलिसांच्या तपासाचा भाग बनलीय. संतोष चव्हाण हा कोथरूडमधील राऊतवाडी येथील एका गणेश मंडळाचा माजी अध्यक्ष असल्याची माहिती मिळालीय.

हल्ल्यानंतर मोबाईल बंद करून फरार झाला होता

बापट यांना मारहाण केल्यानंतर संतोष चव्हाण हा हनुमाननगर परिसरात काही मित्रांना भेटला. त्यानंतर त्याने मोबाईल फोन बंद केला आणि पोलिसांच्या संपर्काबाहेर राहण्याचा प्रयत्न केला. पोलिसांनी त्याचा शोध घेण्यासाठी तपासाची चक्रे वेगाने फिरवली. अखेर गुन्हे शाखेच्या पथकाने त्याचा शोध घेत त्याला अटक केली. संतोष चव्हाण याच्यावर कारवाई झाल्यानंतर आता पोलिसांकडून हल्ल्याच्या संपूर्ण पार्श्वभूमीचा तपास केला जातोय. बापट यांच्यावर हल्ला करण्यामागे नेमका कोणता उद्देश होता, चव्हाणसोबत आणखी कोणाचा सहभाग होता का आणि या घटनेमागे अन्य काही कारण आहे का याचा तपास केला जातोय.

विद्यानंद बापट यांच्यावर हल्ला केल्यानंतर संतोष चव्हाण याने प्रसारमाध्यमांशी संवाद साधला होता. विद्यानंद बापट गणेशोत्सव आणि डीजेबाबत टीका करत असल्याच्या रागातून आपण हे कृत्य केल्याचे त्याच्या वक्तव्यावरून दिसून आले. विद्यानंद बापट टीका करतो, त्याला आणखी मारायलं पाहिजे. त्याला सुट्टी देणार नाही, त्याला आणखी मारणार आहे,” असे चव्हाण म्हणाला होता. पुण्यातील गणेशोत्सवाबाबत कोणी बोलले तर त्याला अशाच प्रकारे कानाखाली मारणार असल्याचेही त्याने म्हटले.