मुंबईहून निघणाऱ्या वंदे भारत एक्स्प्रेसबाबत मोठी अपडेट! वेळापत्रकात मोठा बदल; ८ स्थानकांवर थांबणार

भारतीय रेल्वेची सर्वात प्रीमियम गाडी म्हणून ओळखली जाणारी वंदे भारत एक्स्प्रेस प्रवाशांची आवडीची बनली आहे. वंदे भारत कमी वेळात जास्त अंतर कापते. तसेच आधुनिक सुविधा उपलब्ध असल्यामुळे या एक्स्प्रेसला मोठी पसंती मिळते. दरम्यान, पंतप्रधान नरेंद्र मोदी यांनी ३० सप्टेंबर २०२२ रोजी हिरवा झेंडा दाखवलेल्या देशातील तिसऱ्या वंदे भारत एक्स्प्रेसच्या वेळापत्रकात काहीसा बदल करण्यात आला आहे.

मुंबई - गांधीनगर ही वंदे भारत ट्रेन मुंबई सेंट्रल आणि गांधीनगर राजधानी दरम्यान धावते. ही सेमी हाय स्पीड ट्रेन पश्चिम रेल्वे झोनद्वारे देखभाल आणि चालवली जाते.

ट्रेन क्रमांक २०९०१/२०९०२ आठवड्यातून एक दिवस (बुधवार) वगळता रोज धावणार. पूर्वी सात स्थानकांवर थांबणारी ही गाडी आता आठ स्थानकांवर थांबेल. नवीन थांबा आनंद जंक्शन येथे देण्यात आला आहे. अशा प्रकारे ही वंदे भारत एक्स्प्रेस बोरिवली, वापी, वलसाड, नवसारी, सुरत, वडोदरा जंक्शन, आनंद जंक्शन आणि अहमदाबाद जंक्शनवर थांबेल.

वंदे भारत एक्स्प्रेस (ट्रेन क्रमांक २०९०१) मुंबई सेंट्रलहून सकाळी ६ वाजता निघते. दुपारी १२ वाजून २५ मिनिटांनी गांधीनगर राजधानीला पोहोचते. परतीच्या प्रवासात ट्रेन क्रमांक २०९०२ गांधीनगरहून दुपारी २ वाजून ५ मिनिटांनी निघते. तसेच रात्री ८ वाजून ३० मिनिटांनी मुंबई सेंट्रलला पोहोचते. आता या वंदे भारत एक्स्प्रेसमध्ये आणखी एक थांब्याचा समावेश करण्यात आला आहे.