Vaishnavi Hagawane: वैष्णवी हगवणेची आत्महत्या नव्हे हत्याच, समितीचा धक्कादायक अहवाल समोर

पुण्यातील वैष्णवी हगवणे या तरुणीने सासरच्या जाचाला कंटाळून आत्महत्या केली होती. या प्रकरणाने संपूर्ण महाराष्ट्र हादरून गेला होता. या प्रकरणी वैष्णवी हगवणेच्या नवऱ्यासह तिचे सासू-सासरे, नणंद आणि दीर यांना पोलिसांनी अटक केली आहे. हे सर्व आरोपी सध्या तुरुंगात आहेत. या प्रकरणाचा तपास पोलिसांकडून कसून सुरू आहे. आता या प्रकरणात मोठी अपडेट समोर आली आहे. वैष्णवी हगवणे आत्महत्याप्रकरणी आपला पहिला अहवाल महिला व बालकल्याण समितीने सरकारला सुपूर्द केला. या अहवालात वैष्णवी हगवणेची आत्महत्या हा हुंडाबळीच असल्याचे स्पष्टपणे सांगण्यात आले आहे.

महिला व बालकल्याण समितीने दिलेल्या अहवालामध्ये सासरच्या मंडळींनी हुंड्यासाठी केलेल्या छळामुळेच वैष्णवी हगवणेने आत्महत्या केली असल्याचे सांगण्यात आले आहे. तसेच हे प्रकरण दडपण्यासाठी दबाव आणणारे पोलिस अधिकारी म्हणजेच शशांक हगवणेचे मामा जालिंदर सुपेकर यांची चौकशी करण्याची आणि त्यांच्या पत्नीलाही या प्रकरणात सहआरोपी करण्याची शिफारस अहवालामध्ये करण्यात आली आहे.

आमदार मोनिका राजळे यांच्या अध्यक्षतेखाली नेमण्यात आलेल्या महिला व बालकांचे हक्क आणि कल्याण समितीने वैष्णवी हगवणे आत्महत्या प्रकरणाचा तपास करत अहवाल तयार केला. या समितीने वैष्णवी हगवणे मृत्यू प्रकरणाच्या अनुषंगाने राज्यात महिलांवरील अत्याचार तसेच हुंडाबळीप्रकरणी चौकशी केली होती. वैष्णवीची जाऊबाई मयूरी हगवणेने या प्रकरणाची दखल घेतली असती तर वैष्णवीची आत्महत्या टाळता आली असती. त्यामुळे मयूरीची तक्रार न घेणाऱ्या पोलिस अधिकाऱ्यांवर देखील कारवाई करण्याची शिफारस समितीने अहवालामध्ये केली आहे.

वैष्णवी हगवणे प्रकरणाची चौकशी करताना समितीला काही महत्त्वाची माहिती मिळाली. हुंड्याच्या माध्यमातून हगवणे कुटुंबीयांनी ब्रॅण्डेड कार, चांदीची भांडी, सोने, रोख रक्कम अशा विविध वस्तू आणि पैसे घेतल्याचे पुरावेदेखील समितीला मिळाले आहेत. वैष्णवीला नवरा शशांक आणि सासरच्या मंडळींकडून अमानुष मारहाण, छळ, जाच झाला. हे प्रकरण पूर्णतः कौटुंबिक हिंसाचार, अत्याचार आणि हुंडाबळीचे आहे. जालिंदर सुपेकरांची चौकशी करून त्यांचा सहभाग आढळल्यास निलंबित करून सहआरोपी करा. जालिंदर सुपेकर यांच्या बायकोच्या खात्यात रुखवताच्या निमित्ताने हुंड्याचे पैसे हस्तांतरित झाले. त्यामुळे तिलाही सहआरोपी करा. या प्रकरणाचा तपास तातडीने पूर्ण करा आरोपी आणि सहआरोपी सुटणार नाहीत याची दक्षता घ्या.