Hagawane Family : फक्त सुनाच नाहीतर वडिलांनाही सोडलं नाही, राजेंद्र हगवणेने विकृतीची सीमाच गाठली

पुण्यातील वैष्णवी हगवणे या विवाहित तरुणीच्या मृत्यूमुळे राज्यभरात खळबळ उडाली आहे. हे प्रकरण समोर आल्यानंतर संतापाची लाट उसळली आहे. वैष्णवीचा पती, सासू आणि नणंद यांना अटक झाली होती. आज (२३ मे) वैष्णवीचे सासरे राजेंद्र हगवणे आणि सुशील हगवणे यांना पोलिसांनी ताब्यात घेतले आहे. याच दरम्यान हगवणे घराण्याचा इतिहास समोर आला आहे.

राजेंद्र हगवणे यांचे वडील तुकाराम हगवणे हे मुळशीच्या भुकूम गावचे ख्यातनाम पैलवान होते. १९८० साली ते पुणे जिल्हा परिषद सदस्य म्हणून निवडून आले होते. त्यानंतर तुकाराम हगवणे सभापतीही बनले होते. २००४ साली राजेंद्र हगवणे हे राष्ट्रवादीच्या तिकीटावर मुळशीतून विधानसभा लढले होते, पण निवडणूकीत त्यांचा पराभव झाला.

२००४ मध्ये राजेंद्र हगवणे राष्ट्रवादी काँग्रेस पक्षाचे तालुकाध्यक्ष होते. त्यानंतर ते जिल्हा बँकेच्या निवडणूका लढले होते. पण यात देखील त्यांना अपयश आले. हगवणे यांचा शेती आणि दुधाचा मूळ व्यवसाय होता. कालांतराने त्यांनी जमिनीचे व्यवहार, कंत्राट देखील घ्यायला सुरुवात केली. राजेंद्र हगवणे यांनी स्वत:च्याच वडिलांचे खोटे मृत्यूपत्र बनवून सगळी मालमत्ता स्वत:च्या नावावर करण्याचा प्रयत्न केला होता, त्यांचा हा घाणेरडा डाव फसला.

राजेंद्र हगवणे अजित पवार यांच्या राष्ट्रवादी काँग्रेस पक्षाचे पदाधिकारी होते. ते प्रदेश कार्यकारणीवर सदस्य होते. त्यांचा मुलगा सुशील हगवणे हा युवक तालुकाध्यक्ष होता. पण हुंडाबळीचा गुन्हा दाखल झाल्यानंतर दोघांची पक्षातून हकालपट्टी करण्यात आली होती. सध्या राजेंद्र हगवणे आणि त्यांचे कुटुंब तुरुंगात आहेत.