Thane Crime : ठाण्यातील उपायुक्ताला २५ लाखांच्या लाचखोरीत अटक; आता फरार सुशांत अडकला

ठाणे महापालिका मुख्यालय अतिक्रमण विभागाचे उपायुक्त शंकर पाटोळे आणि ओमकार गायकर या दोघांना २५ लाखाची लाच घेताना अटक केली. त्यानंतर लाचेची १० लाखांची रक्कम सुशांत सुर्वे याच्या बँक खात्यावर ट्रान्स्फर झाल्याचे तपासात समोर आलं होतं. मात्र सुशांत फरार झाला होता. ठाणे लाचलुचपत खात्याच्या पथकाने गुरुवारी रात्री त्याला बेड्या ठोकल्या आणि न्यायालयात नेले असता न्यायालयाने तीन दिवसाची पोलीस कोठडी ठोठावलेली आहे.

ठाण्याच्या नौपाडा पोलीस ठाण्यात उपायुक्त शंकर पाटोळे, ओमकार गायकर यांच्यानंतर गुरुवारी रात्री फरार सुशांतला अटक करण्यात आलेली होती. तीन गाळ्यावर कारवाई केल्यानंतर विकासाचा मार्ग होणार होता. त्यासाठी तक्रारदाराने लाचेची रक्कम देण्यास तयार झाले होते. दरम्यान आणखी रक्कम मागितल्यानंतर तक्रारदाराने मुंबई लाचलुचपत खात्याकडे तक्रार केली.

तक्रार केल्यानंतर २५ लाखांचा हप्ता घेताना दोघांना अटक केली. मात्र सुरुवातीलाच लाचेची १० लाखाची रक्कम सुशांत सुर्वे याच्या बँकेत तक्रारदाराने ट्रान्स्फर केल्याने या लाच प्रकरणात सुशांत हा देखील सहभागी झाल्याचे तपासात समोर आलं. या प्रकरणी नौपाडा पोलीस ठाण्यात पाटोळे, गायकर आणि सुशांत यांच्या विरोधात गुन्हा दाखल करण्यात आलेला होता.

काय आहे प्रकरण?

अभिराज डेव्हलपर्सच्या अभिजीत कदम यांच्याकडून घोडबंदर रोड या ठिकाणी बांधकाम सुरु होतं. अधिकाऱ्यांवर या ठिकाणी असलेलं अतिक्रमण हटवण्यासाठी 25 लाखांची मागणी केल्याचा आरोप आहे. यासाठी 15 लाख रोख आणि 10 लाख रुपये सुशांत सुर्वे याच्या व्यक्तीच्या खात्यात घेऊन काम न केल्याने अभिराज डेव्हलपरच्या अभिजीत कदम यांनी तक्रार केली होती. त्यानंतर ही कारवाई करण्यात आली.