Mumbai News: ताज आणि ट्रायडेंट हॉटेलवर दहशतवादी हल्ल्याची धमकी, मुंबई पोलिस अलर्ट मोडवर

Summary -

• ताज आणि ट्रायडेंट हॉटेलला धमकीचा फोन

• मुंबई पोलिसांनी तातडीने सुरक्षा वाढवली

• सायन परिसरातून आरोपी अटक

• दारूच्या नशेत फोन केल्याची प्राथमिक माहिती समोर

मुंबईतील प्रसिद्ध ताजमहाल पॅलेस आणि ट्रायडेंट हॉटेलवर दहशतवादी हल्ल्याची धमकी देण्यात आली. या धमकीच्या फोननंतर मुंबईत एकच खळबळ उडाली. या घटनेनंतर सुरक्षा यंत्रणा तात्काळ सतर्क झाली आणि परिसरात मोठा बंदोबस्त तैनात करण्यात आला होता. मुंबई पोलिसांनी तपास करून फोन करून हे दोन्ही हॉटेलवर दहशतवादी हल्ल्याची धमकी देणाऱ्या तरुणाला अटक करण्यात आली. धमकीचा फोन करणाऱ्या संशयिताला मुंबई पोलिसांनी सायन परिसरातून अटक केली आहे.

मुंबई पोलिसांनी दिलेल्या माहितीनुसार, एका अज्ञात व्यक्तीने ताजमहाल पॅलेस हॉटेल आणि ट्रायडेंट हॉटेलला फोन करून दहशतवादी हल्ल्याची धमकी दिली होती. फोन करणाऱ्या तरुणाने दावा केला होता की, दहशतवादी हल्ल्यात दोन्ही हॉटेल्सना लक्ष्य केले जाऊ शकते.धमकीचा फोन येताच हॉटेल व्यवस्थापनाने तात्काळ मुंबई पोलिसांना या घटनेची माहिती दिली. मुंबई पोलिसांनी तातडीने कारवाई करत दोन्ही हॉटेल्समधील सुरक्षा वाढवली आणि मोठा पोलिस बंदोबस्त तैनात करण्यात आला. त्यानंतर पोलिसांनी या घटनेचा तपास सुरू केला.

तपासादरम्यान, पोलिसांनी धमकी देणाऱ्या व्यक्तीने कुठून कॉल केला होता याचा शोध घेतला. धकमी देणारा तरुण मुंबईतील असल्याचे तपासातून स्पष्ट झाले. पोलिसांनी धमकी देणाऱ्याला सायन परिसरातून ताब्यात घेतले. पोलिस सध्या आरोपीची चौकशी करत आहेत. पोलिस सध्या धमकीमागील हेतू काय होता याचा शोध घेत आहेत. या तरुणाची पोलिसांकडून कसून चौकशी सुरू आहे.

अशी देखील माहिती समोर आली आहे की, आरोपीने दारूच्या नशेत धमकीचा फोन केला होता. आतापर्यंतच्या तपासात असे समोर आले आहे की, आरोपी कौटुंबिक समस्यांमुळे खूप त्रस्त होता. ज्यामुळे त्याने दारूच्या नशेत हे टोकाचे पाऊल उचलले. आरोपी हा हाऊसकीपिंग कर्मचारी असल्याची माहिती समोर आली आहे. सध्या त्याची पोलिस चौकशी करत आहेत. त्याच्या चौकशीनंतर नेमकं कारण काय ते समोर येईल.