पक्षाच्या कामकाजात अनावश्यक हस्तक्षेप सहन केला जाणार नाही; उपमुख्यमंत्री सुनेत्रा पवारांचा कडक इशारा

संजय गडदे, साम टीव्ही

सुनेत्रा पवारांनी राष्ट्रवादी काँग्रेसच्या वर्धापन दिनी आयोजित कार्यक्रमातून पक्षाची आगामी वाटचाल आणि भूमिका स्पष्ट केली. राष्ट्रवादी काँग्रेस पक्षाच्या कामकाजात अनावश्यक हस्तक्षेप सहन केला जाणार नाही, असा शब्दात उपमुख्यमंत्री सुनेत्रा पवार यांनी इशारा दिला. सुनेत्रा पवार यांनी भर सभेतून पक्षाच्या नियमांचं उल्लंघन करणाऱ्यांवर कडक कारवाईचेही संकेत दिलेत.

राष्ट्रवादी काँग्रेस पक्षाच्या कार्यकर्ते आणि पदाधिकाऱ्यांना संबोधित करताना उपमुख्यमंत्री सुनेत्रा पवार यांनी पक्षहिताला सर्वोच्च प्राधान्य देण्याचा निर्धार व्यक्त केला. पक्षाच्या अनावश्यक हस्तक्षेप सहन केला जाणार नसून आवश्यकतेनुसार कठोर भूमिका घेतली जाईल,असा इशारा त्यांनी दिला.

सुनेत्रा पवार भाषणात म्हणाल्या की, अजित पवार यांनी सर्वांना मान-सन्मान आणि जबाबदाऱ्या दिल्या आहेत. यापुढे पक्षाच्या हिताला प्राधान्य दिले जाईल. कोणाचाही अनावश्यक हस्तक्षेप आढळल्यास त्याची दखल घेतली जाईल. दादा जसे कठोर निर्णय घेत होते. तसे निर्णय घेण्यास मीही मागे हटणार नाही'.

कार्यकर्त्यांना आवाहन करताना सुनेत्रा पवार म्हणाल्या की, 'मला कठोर भूमिका घेण्याची वेळ येणार नाही, अशी अपेक्षा आहे'. यावेळी सुनेत्रा पवार यांनी महामंडळावरील नियुक्तांबाबतही महत्वाचं भाष्य केलं.

महामंडळांवरील नियुक्त्यांबाबत बोलताना सुनेत्रा पवार यांनी स्पष्ट केले की, पक्षासाठी केलेले समर्पण, त्याग आणि पक्षवाढीत दिलेले योगदान हेच निकष असतील. केवळ किती वर्षे पक्षात काम केले यापेक्षा त्या काळात पक्ष किती वाढला, याला अधिक महत्त्व दिले जाईल. पक्षवाढीसाठी नव्याने जोडल्या गेलेल्या व्यक्तींचा योग्य सन्मान राखला जाईल'.

पक्षाच्या विचारसरणीवर भाष्य करताना सुनेत्रा पवार पुढे म्हणाल्या, 'आम्ही विचारांशी कधीही तडजोड केलेली नाही आणि यापुढेही केली जाणार नाही'. सुनेत्रा पवारांनी या भाषणातून पक्ष संघटनेत शिस्त, कार्यक्षमतेला प्राधान्य आणि पक्षनिष्ठेला महत्त्व देण्याचा स्पष्ट संदेश दिल्याचे बोलले जात आहे.