Satyajeet Tambe in VidhanParishad : केंद्राप्रमाणे राज्य शासनानेही योगासनाचा क्रीडा प्रकारात समावेश करावा, सत्यजीत तांबेची विधानपरिषदेत मागणी

Mumbai News : राज्य सरकारतर्फे देण्यात येणाऱ्या प्रतिष्ठेच्या शिवछत्रपती क्रीडा पुरस्कार व क्रीडा प्रकारांमध्ये योगासनाचा समावेश करण्यात यावा. केंद्राप्रमाणे राज्य शासनाने ही क्रीडा प्रकारात योगासनाचा समावेश करावा, अशी आग्रही मागणी नाशिक पदवीधर मतदारसंघाचे आमदार सत्यजीत तांबे यांनी आज विधान परिषदेत केली. या मागणीवर उत्तर देताना याबाबत सरकार सकारात्मक असून लवकरच याबाबतचा निर्णय घेणार असल्याची माहिती क्रीडामंत्री संजय बनसोडे यांनी दिली.

आमदार सत्यजीत तांबे यांनी विधानपरिषदेत चर्चेत सहभागी होताना योगासनाचा समावेश शिवछत्रपती क्रीडा पुरस्कारांमध्ये करण्याची मागणी केली. ते म्हणाले, शिक्षण क्षेत्र, नोकरी, पुरस्कार, किंवा राज्यशासनाच्या बाबतीत हे सगळे लाभ योगासन खेळाडूंना मिळाले पाहिजे. योगासन या क्रीडा प्रकाराचा २०२० मध्ये केंद्र सरकारने राष्ट्रीय खेळांमध्ये समावेश केला गेला आहे.  (Maharashtra News)

२०२२ मध्ये झालेल्या राष्ट्रीय स्पर्धेत महाराष्ट्राला १४० मेडल मिळाले, त्यामध्ये १६ मेडल योगासनामध्ये मिळाले. त्यामुळे सरकारने या पुरस्कारांमध्ये योगासनाचा समावेश करावा, अशी मागणी त्यांनी केली.

त्यावर उत्तर देताना क्रीडा मंत्री संजय बनसोडे म्हणाले, याबाबत तपासू व निर्णय घेऊ मात्र योगासनाचा अंतर्भाव करायलाच पाहिजे असा वरुन निर्णय आहे. त्यामुळे तपासण्याची गरज नाही, योगासनाचा क्रीडा प्रकारात समावेश करण्याचा निर्णय घ्या, असे निर्देश उप सभापती डॉ. नीलम गोऱ्हे यांनी पिठासनावरुन दिले. केंद्राने योगासनांचा क्रीडा प्रकारात समावेश केला आहे तर राज्य सरकार देखील योगासनाचा क्रीडा प्रकारात समावेश करेल व लवकरच याचा निर्णय घेतला जाईल, असे क्रीडा मंत्री संजय बनसोडे यांनी स्पष्ट केले. (Political News)

सभापतींच्या निर्देशांची तत्काळ कार्यवाही करुन योगासनाला क्रीडा प्रकार म्हणून मान्यता द्या, आ. सत्यजीत तांबे यांचे क्रीडा मंत्र्यांना पत्र

केंद्र सरकारने क्रीडा मंत्रालयातर्फे योगासन हा क्रीडा प्रकार म्हणून मान्यता दिलेली आहे. खेलो इंडिया युथ गेम्समध्ये योगासनांचा सामावेश करण्यात आला होता. या स्पर्धेत सर्वाधिक पदके महाराष्ट्राने मिळवली. योगासनांचा शालेय आणि विद्यापीठांच्याही अभ्यासक्रमात सामाविष्ट करण्यात आला आहे. परंतु अद्याप महाराष्ट्र शासनाने योगासनाला क्रीडा प्रकार म्हणून मान्यता दिलेली नाही. त्यामुळे योगासन या क्रीडा प्रकारातील खेळाडूंना नोकरी, शैक्षणिक आणि क्रीडा पुरस्कार अशा प्रकारच्या लाभांपासून वंचित रहावे लागत आहे.

याबाबत संदर्भीय प्रश्नाच्या चर्चेदरम्यान विधान परिषदेच्या सभापतींनी योगासनाला क्रीडा प्रकार म्हणून मान्यता देण्याचे स्पष्ट निर्देश पिठासनावरुन दिले आहेत. त्यावर आपण तात्काळ कार्यवाही करण्याचे आश्वासन दिले आहे. योगासनांचा क्रीडा प्रकारात समावेश करण्याबाबत तात्काळ कार्यवाही करण्यात यावी. जेणेकरून योगासन या क्रीडा प्रकारातील खेळाडूंना शासनाच्या पुरस्कार, नोकर भरतीमधील आरक्षण, शैक्षणिक आणि इतर सवलती प्राप्त होतील, अशी मागणी करणारे पत्र सत्यजीत तांबे यांनी क्रीडा मंत्री संजय बनसोडे यांना दिले आहे.