SSC-HSC Exam Schedule : दहावी-बारावी परीक्षांचे संभाव्य वेळापत्रक जाहीर, पहिला पेपर कधी?

सचिन जाधव

SSC HSC Exam Latest News

महाराष्ट्र राज्य माध्यमिक व उच्च माध्यमिक शिक्षण मंडळाने दहावी बारावी संभाव्य वेळापत्रक जाहीर केले आहे. दहावीची परीक्षा १ मार्च २०२४ ते २२ मार्च २०२४ कालावधीत होणार आहे. तर बारावीची परीक्षा २१ फेब्रुवारी २०२४ ते २३ मार्च २०२४ या कालावधीत होणार आहे. (Latest Marathi News)

महाराष्ट्र राज्य माध्यमिक व उच्च माध्यमिक शिक्षण मंडळाच्या पुणे, नागपूर, औरंगाबाद, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळाकडून फेब्रुवारी-मार्च २०२४ मध्ये इयत्त दहावी आणि बारावीच्या लेखी परीक्षा खालील कालावधीत आयोजित करण्यात येणार आहेत. या परीक्षेचे सविस्तर वेळापत्रकर मंडळाच्या अधिकृत www.mahahsscboard.in संकेतस्थळावर उपलब्ध करून देण्यात आले आहे.

मंडळाने विद्यार्थ्यांच्या अभ्यासक्रमाचे नियोजन व्हावे आणि त्यांच्या मनावरील ताण कमी व्हावा, या दृष्टीकोनातून फेब्रुवारी-मार्च २०२४ च्या लेखी परीक्षेचे संभाव्य वेळापत्रक जाहीर केले आहे. या लेखी परीक्षा प्रचलित पद्धतीनुसार आयोजित करण्यात येणार आहे .

तत्पूर्वी, मंडळाच्या संकेतस्थळावरील संभाव्य वेळापत्रकांची सुविधा ही फक्त माहितीसाठी आहे. परंतु दहावी आणि बारावीच्या परीक्षेपूर्वी माध्यमिक शाळा / उच्च माध्यमिक शाळा/ कनिष्ठ महाविद्यालय यांना छापील स्वरूपात वेळापत्रक देण्यात येणार आहे. तेच वेळापत्रक अंतिम असेल, अशीही माहिती मंडळाने दिली.

दरम्यान, अन्य संकेतस्थळ, अन्य यंत्रणेने छपाई केलेले, व्हॉट्सअॅप किंवा तत्सम माध्यमातून व्हायरल झालेलेले वेळेपत्रक ग्राह्य धरू नये, अशा सूचना देखील मंडळाने दिल्या आहेत. याचबरोबर प्रात्यक्षिक परीक्षा, श्रेणी, तोंडी परीक्षा व अन्य विषयांचे वेळापत्रक स्वतंत्रपणे परीक्षेपूर्वी मंडळामार्फत शाळा/ कनिष्ठ महाविद्यालय यांना कळविण्यात येणार आहे.

सदर वेळापत्रकांबाबत काही सूचना, हरकती असल्यास त्या विभागीय मंडळाकडे तसेच राज्य मंडळाकडे १५ दिवसाच्या आत लेखी स्वरूपात पाठवाव्यात, अशीही माहिती मंडळाने दिली आहे.