एकनाथ शिंदे जेलमध्ये जातील; निवडणुकीनंतर नाईक पुन्हा आक्रमक

ऐकलंत भाजपचे ज्येष्ठ नेते आणि वनमंत्री गणेश नाईकांचं हे विधान....महापालिका निवडणुकीत सुरु झालेला नाईक- शिंदे संघर्ष अद्याप थांबण्याचं नाव घेत नाही...एका विशेष मुलाखतीत गणेश नाईकांनी भ्रष्टाचाराचा आरोप करत शिंदेंना जेलमध्ये जावं लागेल, असा खळबळजनक दावा केलाय...v

दरम्यान गणेश नाईकांनी एकनाथ शिंदेंचे पुत्र खासदार श्रीकांत शिंदेंचेंही राजकीय अस्तित्व संपवण्याचा इशारा दिलाय... यावर श्रीकांत शिंदेंनी प्रत्युत्तर दिलंय. ज्यांच्या घरात तीन माजी आहेत... त्यांनी आम्हाला माजी करण्याची भाषा करू नये, असा टोला श्रीकांत शिंदेंनी लगावलाय.

खरं तर महायुतीची सत्ता आल्यापासूनच गणेश नाईकांना भाजपकडून शिंदेंविरोधात बळ दिलं जात असल्याची चर्चा आहे. नाईकांनी ठाण्यामध्ये जनता दरबार घेत शिंदेंना शह दिला होता. मनपा निवडणुकीत हा संघर्ष आणखी पेटला. नाईकांनी नवी मुंबई महापालिकेत एकहाती भाजपचे 65 नगरसेवक निवडून आणून शिंदेंवर मात केली. त्यानंतर ठाणे आणि कल्याण-डोंबिवलीत भाजपला दूर ठेऊन शिंदेंनी सत्तेचं समीकरण जुळवलं. शिंदे आणि नाईकांमधील संघर्ष शिवसेनेचे ठाण्यातील दिवगंत नेते आनंद दिघेंपासून पाहयला मिळतोय..

1995 - ठाण्याच्या पालकमंत्रिपदावरुन आनंद दिघे आणि नाईकांमध्ये ठिणगी

1999- नाईकांनी शिवसेना सोडल्यानंतर भोईरांना ताकद देत दिघेंकडून नाईकांचा पराभव

2004- पालकमंत्री असताना नाईकांकडून एकनाथ शिंदेंना शह देण्याचा प्रयत्न

2009- गणेश नाईकांचे पुत्र संजीव नाईकांना खासदार बनवून शिंदेंना हादरा

2014- शिंदेंनी भाजपच्या आमदार मंदा म्हात्रेंना ताकद देत नाईकांना पराभूत केलं

2019- पालकमंत्री असताना शिंदेंकडून नाईकांना खिंडीत गाठण्याचा प्रयत्न

ठाणे जिल्हा परीषदेवर भाजपची सत्ता आणणार, असा निर्धार गणेश नाईकांनी बोलून दाखवलाय. ठाणे आणि नवी मुंबईतील वर्चस्वासाठी नाईक-शिंदेंमधील संघर्ष विकोपाला गेलाय. अगदी एकमेकांचे नामोनिशाण मिटवण्याची भाषा दोन्ही पक्षाच्या नेत्यांकडून केली जात असल्यानं महायुतीत वादाची ठिणगी पडलीय. महायुतीतील हा अंतर्गत वाद आणखी किती चिघळणार? नाईक- शिंदेंमधील वर्चस्वाच्या लढाईत नेमकं कोण बाजी मारणार? हे पाहणं महत्त्वाचं आहे...