रेटून 'फेकणं' भाजपची सवय; मेट्रो उद्घाटनावरून रोहित पवारांचा हल्लाबोल

- रश्मी पुराणिक

मुंबई : पुण्यात पंतप्रधान नरेंद्र मोदींच्या (Narendra Modi) हस्ते पुणे मेट्रोचे उद्घाटन झाले. पुणे मेट्रोवरून राज्यात आता श्रेयवादाची लढाई सुरु झाल्याचे दिसून येत असून युपीए सरकारच्या काळातच मेट्रोला (Pune Metro) मंजुरी मिळाल्याचे राष्ट्रवादीच्या नेत्यांसह काँग्रेसचे नेते सांगत आहेत. याच संदर्भात राष्ट्रवादीचे कर्जत-जामखेडचे आमदार रोहित पवार यांनी भाजपवर जोरदार निशाणा साधला आहे.

हे देखील पहा :

रोहित पवार (Rohit Pawar) यांनी म्हटलं आहे, रेटून ‘फेकणं’ ही भाजपाची नेहमीची सवय असली तरी लोकांची दिशाभूल होऊ नये म्हणून आणि खोटारड्या भाजपाला आरसा दाखवण्यासाठी 'मेट्रो प्रवासा'चा हा इतिहास मांडावा लागेल. २००९ ला पुणे व पिंपरी महापालिकेत राष्ट्रवादी (NCP) आणि काँग्रेस (Congress) पक्षाची सत्ता असताना मेट्रोचा प्रस्ताव तयार करण्यात आला.

त्यानंतर राज्यात आघाडी तर केंद्रात UPA सरकार असताना तो मंजुरीसाठी पाठवला आणि महापालिकेत राष्ट्रवादी-काँग्रेसची सत्ता असतानाच मेट्रोचं भूमिपूजन झालं. पण गेल्या पाच वर्षात पुणे मेट्रोच्या ५४ कि.मी.च्या प्रकल्पापैकी ३२ कि.मी.चा पहिला टप्पाही अजून भाजपला पूर्ण करता आला नसल्याचे पवार म्हणाले.

निवडणूक येताच ५ कि.मी.च्या अर्धवट मार्गाचं मेट्रोपेक्षाही सुस्साट वेगाने उद्घाटन केलं. आपण पेट्रोल-डिझेलवर भरमसाठ कर लावून सामान्य माणसाचा खिसा कापला.. तरीही गेल्या ६० वर्षांत विविध सरकारांनी कष्टाने उभ्या केलेल्या संस्था/कंपन्यांची विक्री करावी लागली. हे आपलं कर्तृत्व! असा टोलाही रोहित पवारांनी नरेंद्र मोदींसह भाजपला लगावला आहे. एकूणच आज पुणे मेट्रो प्रकल्पावरून सकाळपासून राज्यात आरोप-प्रत्यारोप होत आहेत. भाजपच्या अधिकृत ट्विटर अकाउंटवरून शरद पवार (Sharad Pawar) यांच्यावर टीका झाली त्याला रोहित पवार यांनी जोरदार उत्तर दिले.

Edited By : Krushnarav Sathe