सचिन कदम, साम टीव्ही
रायगड जिल्ह्यातील माणगाव तालुक्यातील लोणेरे परिसरात एक धक्कादायक घटना घडली आहे. येथील एका लॉजिगमध्ये एका तरुणीची धारधार शस्त्राने वार करून निर्घृण हत्या करण्यात आली आहे. या घटनेमुळे संपूर्ण रायगड जिल्ह्यात खळबळ उडाली असून परिसरात भीतीचे वातावरण पसरले आहे.
मिळालेल्या माहितीनुसार, माणगाव तालुक्यातील लोणेरे येथील एका लॉजिगमध्ये ही हत्या झाली. अज्ञात आरोपीने तरुणीच्या अंगावर धारधार शस्त्राने सपासप वार करून तिला जागीच ठार केले. सूत्रांनी दिलेल्या माहितीनुसार तरुणीचा मृतदेह विवस्त्र अवस्थेत आढळून आला असून हत्येनंतर आरोपी घटनास्थळावरून फरार झाला आहे.
घटनेची माहिती मिळताच गोरेगाव पोलीस पथक तातडीने घटनास्थळी दाखल झाले. गुन्ह्याचे गांभीर्य ओळखून फॉरेन्सिक टीमलाही पाचारण करण्यात आले आहे. पोलिसांकडून सध्या मृतदेहाची ओळख पटवण्याचे काम युद्धपातळीवर सुरू आहे. तसेच, लॉजिंगमधील सीसीटीव्ही फुटेज आणि नोंदवही (Register) तपासली जात असून आरोपीच्या शोधासाठी पथके रवाना करण्यात आली आहेत.
ही हत्या प्रेम प्रकरणातून झाली की अन्य कोणत्या कारणातून, याचा तपास आता गोरेगाव पोलीस करत आहेत. भरवस्तीत असलेल्या लॉजिंगमध्ये अशा प्रकारे हत्या झाल्याने महिलांच्या सुरक्षेचा प्रश्न पुन्हा एकदा ऐरणीवर आला आहे.