विश्वासाने दिले १.२० कोटी, बॅग उघडताच कागदी पुड्या; राजस्थानात आवळल्या आरोपीच्या मुसक्या

संजय गडदे, साम टीव्ही

विश्वासाने सोपविण्यात आलेल्या तब्बल १ कोटी २० लाख रुपयांच्या रोकडचा अपहार केल्याप्रकरणी पायधुनी पोलिसांनी मोठी कारवाई केली आहे. तांत्रिक तपास, सीसीटीव्ही फुटेज आणि गोपनीय माहितीच्या आधारे तपास करत पोलिसांनी राजस्थानातून एका आरोपीला अटक केली असून त्याच्याकडून १ कोटी १६ लाख ५० हजार रुपयांची रोकड जप्त करण्यात आली आहे. या प्रकरणातील मुख्य आरोपीचा शोध सुरू आहे.

पोलिसांच्या माहितीनुसार, ८ ऑगस्ट २०२६ रोजी फिर्यादीने दुसऱ्या कार्यालयातून १ कोटी २० लाख रुपये आणण्याची सूचना आरोपी पीरसिंग देवडा याला केली होती. त्यानुसार रोकड असलेल्या दोन बॅगा फिर्यादीकडे देण्यासाठी आरोपीकडे विश्वासाने सोपविण्यात आल्या होत्या. मात्र, आरोपीने या बॅगा बदलून त्यामध्ये कागदी पुड्या भरल्या आणि प्रत्यक्ष रोकडचा अपहार केला. या घटनेप्रकरणी १० ऑगस्ट २०२६ रोजी पायधुनी पोलीस ठाण्यात गुन्हा क्रमांक ८७२/२०२६, भारतीय न्याय संहिता २०२३ मधील कलम ३१६(४) अन्वये गुन्हा दाखल करण्यात आला. गुन्ह्याचा तपास करताना पोलिसांनी तांत्रिक बाबी, सीसीटीव्ही फुटेज आणि गोपनीय माहितीच्या आधारे प्रथम घटनास्थळाची पाहणी केली. त्यानंतर तपास पथकाने अहमदाबाद येथे जाऊन तपासाची दिशा निश्चित केली.

तपासादरम्यान आरोपीने आपल्या साथीदारासोबत संगनमत करून हा गुन्हा केल्याचे पोलिसांच्या तपासात निष्पन्न झाल्याचे प्रेस नोटमध्ये नमूद करण्यात आले आहे. त्यानंतर पोलिस पथकाने राजस्थान गाठून १४ ऑगस्ट रोजी आरोपीचा साथीदार युवराज सिंह वसंतसिंग देवडा (वय २४) याला अटक केली. तो राजस्थानातील सिरोही जिल्ह्यातील मामावली येथील रहिवासी असल्याचे नमूद आहे. अटक आरोपीकडून अपहार झालेल्या १ कोटी २० लाख रुपयांपैकी १ कोटी १६ लाख ५० हजार रुपयांची रोकड जप्त करण्यात पोलिसांना यश आले आहे. उर्वरित रक्कम आणि गुन्ह्यातील इतर बाबींबाबत तपास सुरू आहे.

या प्रकरणातील मुख्य आरोपी पीरसिंग वसंतसिंग देवडा (वय ३०) याचा शोध घेण्यात येत असून गुन्ह्याचा पुढील तपास सुरू आहे. ही कारवाई वरिष्ठ पोलिस अधिकाऱ्यांच्या मार्गदर्शनाखाली पायधुनी पोलिसांनी तपास पथकाने केली.