School Holiday : पुणेकरांसाठी महत्त्वाची बातमी, २३ जानेवारीला शाळांना सुट्टी; जाणून घ्या कारण

पुण्यातून मोठी बातमी समोर आली आहे. महानगरपालिका हद्दीतील शाळा २३ जानेवारी रोजी दुपारी १२ नंतर बंद करण्याचे जिल्हाधिकाऱ्यांचे आदेश जारी केले आहेत. पुणे ग्रँड चॅलेंज टूर-२०२६ आंतरराष्ट्रीय सायकलिंग स्पर्धेच्या चौथ्या टप्प्याच्या पार्श्वभूमीवर हा निर्णय घेण्यात आला आहे. शिवाय दुपारी १२ च्या आधी शाळा सुरु राहण्यास परवानगी असल्याचं पालिकेने म्हटलं आहे.

पुणे ग्रँड चॅलेंज टूर-२०२६ आंतरराष्ट्रीय सायकलिंग स्पर्धेचा २३ जानेवारी रोजी चौथा टप्पा पार पडणार आहे. चौथ्या टप्प्याच्या अनुषंगाने पुणे महानगरपालिकेच्या हद्दीतील सर्व सरकारी व खाजगी शाळा बंद ठेवण्यात येणार आहे. मात्र सरकारी व खाजगी शाळा २३ जानेवारी रोजी दुपारी १२ वाजेपर्यंत सुरु ठेवण्यात याव्या आणि त्यांनतर शाळा बंद करण्याचे आदेश जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र डूडी यांनी जारी केले आहेत.

स्पर्धेचा चौथा टप्पा हा बालेवाडी ते बालगंधर्व रंगमंदिर या दरम्यान आयोजित करण्यात आला आहे. या स्पर्धेचे एकूण अंतर ५८ कि.मी आहे. त्यामुळे पुणे शहरातील होणारी वाहतूक कोंडी तसेच बहुतेक शाळेतील विद्यार्थ्यांची गैरसोय टाळण्याच्यादृष्टीने आदेश जारी करण्यात आल्याचेही आदेशात नमूद करण्यात आले आहे.