Shocking : ४२ सेकंदाचा व्हिडिओ काढला, सावकाराच्या जाचाला कंटाळून व्यापाराने उचललं टोकाचं पाऊल; संभाजीनगरमधील धक्कादायक प्रकार

माधव सावरगावे, छत्रपती संभाजीनगर

Sambhajinagar Trader Suicide Due To Moneylender Harassment : छत्रपती संभाजीनगरमधून मोठी बातमी समोर आली आहे. जिल्ह्यातील वैजापुरात व्यापाऱ्याने सावकाराच्या जाचाला कंटाळून आत्महत्या केल्याचं समोर आलं आहे. सावकाराच्या जाचाला कंटाळून आत्महत्या करण्याची ही घटना पहिलीच नसली तरी या घटनेने परिसरात खळबळ उडाली आहे. दरम्यान व्यापाऱ्याने आत्महत्येपूर्वी व्हिडिओ काढला असून "ये विक्या, मुक्या बहुत परेशान कर रहे है मुझे" असं म्हटलं आहे. याप्रकरणी ७ जणांवर गुन्हा दाखल करण्यात आला आहे.

मिळालेल्या माहितीनुसार, जिल्ह्यातील वैजापुर शहरातील शेख करीम शेख चुन्नू (४५) हे बटाटा व्यापारी होते. करिम यांनी सावकाराकडून कर्ज घेतल्याने तो सतत त्यांचा जाच करत होता. या जाचाला कंटाळून घरातच गळफास घेऊन करिम यांनी आत्महत्या केल्याची धक्कादायक घटना उघडकीस आली.

आत्महत्या करण्यापूर्वी करिम यांनी मोबाइलवर व्हिडिओ रेकॉर्ड काढला. त्यावरून अन्नू आझाम शेख, वसीम बाबू बागवान, विलास शेटे, घायवट बाई, विनोद राजपूत, मुकेश राजपूत आणि विक्रम राजपूत या ७ जणांवर गुन्हा दाखल झाला. त्यांनी पैशांच्या कारणावरून शेख करीम यांना मानसिक त्रास दिला असल्याचं समोर आलं आहे.

व्हिडिओमध्ये चित्रित झाल्याप्रमाणे, करिम यांनी म्हटले आहे की, "विक्या आणि मुक्या मला खूप त्रास देत आहेत. मी माझ्या कुटुंबियांवर खूप प्रेम करतो. परंतु मी खूप वैतागलो आहे. मी आत्महत्या करत आहे." असा ४२ सेकंदांचा व्हिडिओ शेख करीम यांनी गळफास घेण्यापूर्वी काढला. या व्हिडिओवरून पोलीस पुढील तपास करत आहेत.