Pune Rain: पुण्यातील पावसाचा फटका रेल्वेसेवेवर, १४ ट्रेन रद्द तर ५ गाड्याच्या मार्गात बदल; वाचा संपूर्ण लिस्ट

• पुणे विभागात भूस्खलन झाल्यामुळे रेल्वे वाहतुकीवर मोठा परिणाम

• १४ ट्रेन पूर्णपणे रद्द करण्यात आल्या

• ५ गाड्यांचे मार्ग बदलण्यात आलेत

• काही गाड्या पुणे स्थानकापर्यंतच धावणार

सचिन जाधव, पुणे

पुणे विभागातील भूस्खलनामुळे रेल्वे वाहतुकीवर मोठा परिणाम झाला आहे. अनेक महत्त्वाच्या प्रवासी गाड्या रद्द करण्यात आल्या असून काही गाड्यांचे मार्ग बदलण्यात आले आहेत. तर काही गाड्या पुणे स्थानकापर्यंतच धावणार असून काही गाड्या पुण्यातूनच पुढे सुरू करण्यात येणार आहेत. पुणे विभागातील TKW–MHLC आणि मध्य रेषेदरम्यान तसेच UPML मार्गावरील रेल्वे रुळाजवळ झालेल्या भूस्खलनामुळे मध्य रेल्वेला अनेक गाड्यांच्या वाहतुकीत बदल करावे लागले आहेत.

भूस्खलनामुळे पुणे–भुज, भुज–पुणे, पुणे–सोलापूर, सोलापूर–पुणे, पुणे–सीएसएमटी, सीएसएमटी–पुणे यांसह एकूण १४ गाड्या पूर्णपणे रद्द करण्यात आल्या आहेत. तसेच CSMT–कोल्हापूर ही गाडी CSMT ते कराड दरम्यान रद्द करण्यात आली असून ती कराडपासून पुढे नियोजित वेळेनुसार धावणार आहे. याशिवाय चेन्नई–सीएसएमटी, वेलंकन्नी–दादर, नांदेड–पनवेल, यशवंतपूर–बाडमेर आणि कोयंबतूर–लोकमान्य टिळक टर्मिनस या गाड्यांचे मार्ग बदलण्यात आले आहेत.

हुबळी–दादर, हैदराबाद–सीएसएमटी आणि सोलापूर–सीएसएमटी या गाड्या पुणे स्थानकापर्यंतच धावतील. तर दादर–हुबळी,सीएसएमटी–सिकंदराबाद आणि सीएसएमटी–सोलापूर या गाड्या पुणे स्थानकावरून पुढील प्रवासासाठी सुरू करण्यात येणार आहेत. याशिवाय CSMT–नांदेड ही गाडी दोन तास उशिराने, दुपारी ३ वाजून १५ मिनिटांनी सुटणार आहे.

दरम्यान, रेल्वे प्रशासनाने प्रवाशांना प्रवासापूर्वी आपल्या गाडीची सद्यस्थिती तपासूनच प्रवासाचे नियोजन करण्याचे आवाहन केले आहे. भूस्खलनानंतर रेल्वे प्रशासनाकडून मार्ग सुरळीत करण्याचे काम युद्धपातळीवर सुरू आहे. परिस्थिती सामान्य होताच रेल्वे सेवा पूर्ववत करण्यात येईल,अशी माहिती प्रशासनाने दिली आहे.