Pune Fake Lady Police Arrested: पुण्यात 'लेडी सिंघम'चा पर्दाफाश! तरुणीकडून दोन पोलिस गणवेश जप्त

Pune Fake Lady Police Officer Arrested: पुण्यात पोलिसांच्या वर्दीत फिरत नागरिकांवर रुबाब दाखवणाऱ्या एका तोतया महिला पोलिस अधिकाऱ्याचा भांडाफोड झाला आहे. लष्कर पोलिस ठाण्याच्या कर्मचाऱ्यांनी २५ वर्षीय तरुणीला अटक केली असून तिच्याकडून पोलिसांच्या दोन वर्दीचे सेट जप्त करण्यात आले आहेत. या घटनेमुळे खऱ्या पोलिसांनाही धक्का बसला असून या प्रकरणाची सखोल चौकशी सुरू आहे.

समिना आसिफ इनामदार उर्फ समिना अयुब पठाण (वय २५) असे अटक करण्यात आलेल्या तरुणीचे नाव आहे. ती पोलिस उपनिरीक्षक दर्जाचा गणवेश परिधान करून पुण्यातील कॅम्प परिसरात फिरत असल्याची माहिती समोर आली आहे. प्राथमिक चौकशीत तिने एका नामांकित खासगी क्लिनिकमध्ये डॉक्टरांची अपॉइंटमेंट मिळवण्यासाठी पोलिसांचा गणवेश परिधान केल्याची कबुली दिली आहे.

मिळालेल्या माहितीनुसार, ६ जून रोजी लष्कर पोलिस ठाण्याचे पोलिस उपनिरीक्षक महेश शिंदे हे कॅम्प परिसरात गस्त घालत होते. यावेळी एका खासगी क्लिनिकबाहेर पोलिसांच्या वर्दीत उभी असलेली महिला त्यांच्या नजरेस पडली. तिच्या हालचाली संशयास्पद वाटल्याने त्यांनी महिला पोलिस कर्मचाऱ्यांच्या मदतीने तिची चौकशी सुरू केली.

चौकशीदरम्यान संबंधित महिलेला ती कोणत्या पोलिस ठाण्यात कार्यरत आहे, तिचे ओळखपत्र कुठे आहे आणि इतर पोलिसी कामकाजासंदर्भातील प्रश्न विचारण्यात आले. मात्र, पोलिसी भाषेची माहिती नसल्याने आणि उत्तर देताना ती गोंधळल्याने पोलिसांचा संशय अधिक बळावला. सखोल चौकशी केल्यानंतर ती खऱ्या अर्थाने पोलिस कर्मचारी नसून तोतया असल्याचे उघड झाले.

पोलिसांनी तिची झडती घेतली असता तिच्याकडे पोलिसांच्या वर्दीचे दोन संच आढळून आले. हे गणवेश तिने कुठून मिळवले, त्यांचा वापर करून तिने यापूर्वी काही लाभ घेतले आहेत का, तसेच इतर कोणाला फसवले आहे का, याचा तपास आता सुरू आहे. अशी माहिती, पोलिस उपआयुक्त संदीप भाजीभाकरे यांनी दिली.

पोलिसांच्या माहितीनुसार, समिना हिचे पोलिस अधिकारी बनण्याचे स्वप्न होते. मात्र ते पूर्ण होऊ शकले नाही. सध्या ती एका खासगी कंपनीत नोकरी करत होती. डॉक्टरांची वेळ मिळत नसल्याने तिने पोलिस असल्याचा दबाव निर्माण करून अपॉइंटमेंट मिळवण्याचा प्रयत्न केला. मात्र तिचा हा बनाव पोलिसांच्या सतर्कतेमुळे उघडकीस आला आणि अखेर तिला अटक करण्यात आली.