पुणे येथे गणेश मिरवणुकीत विजेचा शॉक बसून दोन जण गंभीर जखमी.
डीजे गाडी विजेच्या खांबाला धडकल्याने तारा तुटून अंगावर पडल्या.
जखमींवर निरामय हॉस्पिटलमध्ये आयसीयूत उपचार सुरू.
घटनेनंतर नागरिकांमध्ये भीतीचे वातावरण.
अनंत चतुर्दशी दिवशी आज राज्यभरात सर्वत्र लाडक्या गणरायाला निरोप देण्यासाठी भाविक सज्ज झाले आहेत. आज ११ दिवसांच्या गणपतींचे विसर्जन होणार असून काल १० दिवसीय गणपतींच्या मूर्तींचे विसर्जन झाले. अशातच पुण्यातील पिंपरी चिंचवड परिसरातील मोहन नगर येथे काल गणेशोत्सवाच्या मिरवणुकी दरम्यान दुर्घटना घडली. मिरवणूक सुरू असताना अचानक विजेचा शॉक लागून दोन जण गंभीर जखमी झाले. जखमींवर रुग्णालयात उपचार सुरु आहेत.
प्राथमिक माहितीनुसार, मिरवणुकीदरम्यान डीजे साऊंडची गाडी विजेच्या खांबाला धडकली. या धडकेमुळे इलेक्ट्रिक वायर तुटून थेट जमिनीवर कोसळल्या. या तारा थेट मिरवणुकीत उपस्थित दोन तरुणांच्या अंगावर पडल्या आणि त्यांना जोरात शॉक बसला. या अपघातात प्रवीण राजेंद्र कुटे आणि अमोल सदाशिव चव्हाण गंभीर जखमी झाले.
दोघांनाही तत्काळ उपचारासाठी चिंचवड येथील निरामय हॉस्पिटलमध्ये दाखल करण्यात आले. रात्री ११ वाजता त्यांना आयसीयूत हलवण्यात आले असून त्यांच्यावर सध्या उपचार सुरू आहेत. या घटनेनंतर परिसरात भीतीचे वातावरण पसरले होते. घटनास्थळी एमएसईबीचे अधिकारी आणि भोसरी विभागातील कर्मचाऱ्यांना बोलाविण्यात आले.
गणेशोत्सवाच्या काळात डीजे गाड्यांमुळे वारंवार अपघात घडतात. उंचावरील वीजतारा आणि मिरवणुकीतील सजावट, डीजे साऊंड यामुळे धोका वाढतो त्यामुळे नागरिकांना उत्सवात काळजी घेण्याचे आवाहन प्रशासनाने केले आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.