Pune News : पुण्याच्या रुग्णालयात घुसले बांगलादेशी? स्वातंत्र्य दिनाच्या पूर्वसंध्येला पुण्यात खळबळ

बातमी पुण्यातून...स्वातंत्र्य दिनाच्या पूर्वसंध्येला पुणे पोलिसांनी तीन जणांना ताब्यात घेतल्यामुळे एकच खळबळ उडाली आहे. पुण्यातील कमला नेहरू रुग्णालयात उपचार घेण्यासाठी आलेल्या ३ संशयित तरुणांना आज पोलिसांनी ताब्यात घेतलं. सोशल मीडियावर या ३ तरुणांचे फोटो व्हायरल झाले होते... हे नेमके तरुण कोण आहेत? कुठून आले होते? काय आहे हा संपूर्ण प्रकार पाहूया..

गेल्या काही दिवसांपासून पुण्यात सातत्यानं हादरवणा-या घटना घडतायत...कधी ड्रग्ज ऱॅकेट...कधी हिट अँड रन प्रकरण, तर कधी पूर...हे कमी होतं की काय बुधवारची सकाळ पुणेकरांसाठी खळबळजनक बातमी घेऊनच उजाडली....पुण्याच्या मंगळवार पेठेतील पुणे महापालिकेच्या कमला नेहरू रुग्णालयात 3 संशयीत दहशतवादी घुसल्याची बातमी पसरली. हॉस्पिटलच्या सुरक्षारक्षकानं खबरदारी घेत तातडीने त्या तिघा संशयितांना एका खोलीत बंद केलं. पोलिस कंट्रोलरूमला या याबाबत फोन करण्यात आला. तातडीनं पोलिसांचे पथक रुग्णालयात दाखल झालं...

पोलिसांनी खबरदारी म्हणून रुग्णालयातून रुग्ण आणि नातेवाईकांना बाहेर काढण्यास सुरुवात केली. कारण पोलिसांनी काल ३ संशियत लोकांचे फोटो रुग्णालय प्रशासनाला पाठवले होते. आणि तेच ते तिघे रुग्णालयात तपासणीसाठी आले होते. त्यामुऴे अधिकच गोंधळ उडाला. या तिन्ही संशयतांच्या घरी पुणे पोलिसांनी आणि बॉम्बशोधक व नाशक पथकाने देखील जाडाझडती घेतली.

ताब्यात घेतलेले तरूण पुण्यातील लोहियानगर परिसरात राहणारे आहेत. ते मूळचे बिहारचे आहेत. काही दिवसांपूर्वीच पुणे पोलिसांनी बांग्लादेशी घुसखोरांवर कारवाई केली होती. त्यात 15 ऑगस्टच्या पार्श्वभूमी असल्यानं पोलिसांनी या तिघांची अधिक सतर्कतेनं सखोल चौकशी सुरू केलीय. या घटनेमुळे मात्र पुणेकर जागरुक आणि सतर्क आहेत एवढं नक्की...