Pune Indrayani Bridge Collapse : त्यांना वाचवा...त्यांना वाचवा...महिलेच्या किंकाळ्या अन्...; पूल कोसळल्याचा चित्तथरारक VIDEO समोर

पुणे : पुण्याच्या मावळ तालुक्यात आज अतिशय दुर्दैवी घटना घडली. मावळ तालुक्यातील कुंडमळा पर्यटनस्थळी इंद्रायणी नदीवरील लोखंडी पूल कोसळला. विशेष म्हणजे मावळ तालुक्यात दोन दिवसांपासून मुसळधार पाऊस पडत आहे. त्यामुळे इंद्रायणी नदी प्रवाहीत झाली आहे. अशा परिस्थिती पूल कोसळला. त्यामुळे मोठी हानी झाली आहे.

पूल कोसळला तेव्हा त्या पुलावर ५० ते १०० पर्यटक होते, अशी माहिती प्रत्यक्षदर्शींनी दिली आहे. तसेच पूल कोसळला तेव्हा नेमकं काय घडलं? ते देखील कॅमेऱ्यात कैद झालं आहे. अतिशय चित्तथरारक अशी घटना ही कॅमेऱ्यात कैद झाली आहे. पूल कोसळल्यानंतर प्रचंड किंकाळ्या ऐकू येतात. यावेळी काही जण नदीच्या प्रवाहासोबत वाहून जाताना दिसत आहेत. अंगावर काटा आणणारा असा हा व्हिडीओ आहे. हा व्हिडीओ सध्या सोशल मीडियावर व्हायरल होत आहे. तर हा पूल कोसळला तेव्हा काही दुचाकी देखील त्यात अडकलेल्या पाहायला मिळायला येत आहे.

नेमकं काय घडलं?

रविवार असल्याने मोठ्या संख्येने पर्यटक त्या ठिकाणी उपस्थित होते. काही जण पुलावर उभारले होते. तेव्हा हा पूल कोसळल्याने ही दुर्घटना घडली आहे. यामध्ये नेमके किती जण बुडाले आहेत हे अद्याप स्पष्ट होऊ शकलं नाही. अंदाजे २० ते २५ जण बुडाल्याची प्राथमिक माहिती मिळत आहे. कुंडमळा या ठिकाणी इंद्रायणी नदीवर एक जुना पूल आहे. या पुलावर अनेक पर्यटक उपस्थित होते. सुट्टीचा दिवस असल्याने या ठिकाणी मोठी गर्दी होती. त्यातच हा पूल कोसळल्याने अनेक जण वाहून गेले. यामध्ये काही लहान मुलेही असल्याची भीती व्यक्त केली जात आहे.

कुंडमळामध्ये ही दुर्घटना घडल्यानंतर या ठिकाणी एनडीआरएफचे पथक दाखल झालं असून बचाव कार्य सुरू आहे. तसेच या ठिकाणी अग्निशमन दलही पोहोचल्याची माहिती आहे. या ठिकाणी अजूनही काही पर्यंटक अडकले आहेत, त्यांना वाचवलं जात आहे. या ठिकाणी गर्दी करु नये असं आवाहन पोलिसांनी केलं आहे.