भाच्याचा संसार मोडल्याचा प्रचंड राग! जंगलात नेऊन सासऱ्याच्या डोक्यात घातला दगड; पुण्यात हत्येने खळबळ

सचिन जाधव, पुणे प्रतिनिधी, साम टीव्ही मराठी

Pune Crime News Update : भाच्याचा संसार मोडल्याच्या रागातून एकाने भाच्याच्या सासऱ्याची डोक्यात मोठा दगड मारून निर्घृण हत्या केल्याची धक्कादायक घटना पुण्यात उघडकीस आली आहे. हडपसर भागातील महंमदवाडी येथील लक्ष्मी पार्कजवळील फॉरेस्टच्या डोंगरावर रविवारी रात्री १०:३० वाजण्याच्या सुमारास हा प्रकार घडला. विशेष म्हणजे, हत्या केल्यानंतर रक्ताने माखलेला आरोपी स्वतः चालत पोलीस ठाण्यात गेला आणि त्याने गुन्ह्याची कबुली दिली.

नेमकी घटना काय?

मयत व्यक्तीचे नाव सैफन बाबूलाल सय्यद (वय ४३, रा. हडपसर, पुणे) असे आहे. सैफन यांच्या मुलगी सना हिचा विवाह आरोपी हनुमंत उर्फ सागर कांबळे (वय २५, रा. महंमदवाडी, पुणे) याच्या भाच्याशी झाला होता. मात्र, काही दिवसांपूर्वी आरोपीच्या भाच्याचा मृत्यू झाला. पतीच्या निधनानंतर सना आणि सासरच्या मंडळींमध्ये वाद सुरू होते.

रविवारी पुन्हा वाद झाल्यानंतर सना रागाच्या भरात घराबाहेर पडून जंगलाच्या दिशेने निघून गेली. तिला शोधण्यासाठी तिचे वडील सैफन सय्यद आणि आरोपी हनुमंत कांबळे हे दोघे महंमदवाडीतील फॉरेस्टच्या डोंगराकडे गेले.

वादाचे रूपांतर हत्येत:

डोंगरावरील सिमेंटच्या टाकीजवळ पोहोचल्यावर, 'सना सासरी व्यवस्थित राहत नाही' या कारणावरून दोघांमध्ये जोरदार वाद सुरू झाला. या वादातून संतापलेल्या हनुमंत कांबळे याने तेथे पडलेला एक मोठा दगड थेट सैफन यांच्या डोक्यात मारला. हा वार इतका भीषण होता की सैफन यांचा जागीच मृत्यू झाला.

आरडाओरडा करत आरोपी पोलीस ठाण्यात हजर:

हत्या केल्यानंतर रात्री पावणेबाराच्या सुमारास आरोपी हनुमंत कांबळे हा रक्ताने माखलेल्या कपड्यांमध्ये, रडत आणि आरडाओरडा करत थेट काळेपडळ पोलीस ठाण्यात पोहोचला. त्याने स्वतःच पोलिसांना घटनेची माहिती देऊन आत्मसमर्पण केले.

या प्रकरणी काळेपडळ पोलिसांनी आरोपी हनुमंत कांबळे याच्यावर हत्येचा (भारतीय न्याय संहिता कलम १०३(१)) गुन्हा दाखल करून त्याला अटक केली आहे. काळेपडळ पोलीस या घटनेचा अधिक तपास करत आहेत.