Pune: 'मला पप्पी दे, माझ्याकडे पैसे आहेत'; ७३ वर्षीय वृद्धाकडून २७ वर्षीय तरूणीचा विनयभंग, पुण्यात खळबळ

पुण्यात माणुसकीला काळिमा फासणारी घटना उघडकीस आली आहे. एका ७३ वर्षीय वृद्धाने २७ वर्षीय तरूणीसोबत अश्लील वर्तन केलं आहे. तसेच तिच्यावर मानसिक दबाव आणण्याचा प्रयत्न केला. तरूणी एका खासगी क्लिनिकमध्ये काम करीत असून, पोलिसांना याची माहिती दिल्यानंतर त्यांनी गुन्हा दाखल करत आरोपीला अटक केली आहे. या घटनेनंतर परिसरात खळबळ उडाली आहे.

मिळालेल्या माहितीनुसार, ही धक्कादायक घटना पुण्यातील विश्रामबाग रोड परिसरातील एका खासगी क्लिनिकमध्ये घडली. ३ जुलै रोजी सायंकाळी ७ वाजण्याच्या सुमारास ७३ वर्षीय वृद्ध क्लिनिकमध्ये त्यावेळेस तरूणी त्या ठिकाणी उपस्थित होती. तरूणी एकटी असल्याचं पाहताच वृद्ध व्यक्तीने संधी साधली.

आरोपीने तिच्याशी अश्लील वर्तन करण्यास सुरूवात केली. तसेच रिसेप्शनिस्टच्या गालाला हात लावत 'पप्पी दे' अशी विकृत मागणी केली. त्यानंतर आरोपीने खिशात हात घातला, आणि पीडितेला, 'माझ्याकडे पैसे आहेत. तुला हॉटेलमध्ये जेवायला घेऊन जातो, तुला जे काही हवंय, ते मी तुला देतो, पण तू मला जे पाहिजे ते कर', असं म्हणत तरूणीचा विनयभंग केला.

या घटनेनंतर तरूणी घाबरली. ती क्लिनिकमधून पळाली. वृ्द्धाने तिचा पाठलाग केला. तिला जवळ धरलं, आणि 'उद्या तू क्लिनिकमध्ये आहेस ना?' असा प्रश्न विचारत तिला मानसिक त्रास दिला. वृद्धाच्या याच त्रासाला कंटाळून तिने थेट विश्रामबाग पोलीस ठाणे गाठले. तसेच आरोपीविरोधात तक्रार दाखल केली.

विश्रामबाग पोलिसांनी आरोपीविरोधात तक्रार दाखल करत अटक केली आहे. तसेच सीसीटीव्ही फुटेजच्या आधारे पोलिसांचे पुढील तपास सुरू आहे. या घटनेनंतर परिसरात खळबळ उडाली आहे.