Pune : आईला शिवी घातली म्हणून संतापला, मित्रानेच केली मित्राची हत्या; पुण्यातील धक्कादायक घटना

सचिन जाधव, पुणे

पुण्यातील मुंढवा परिसरात एका धक्कादायक घटनेने खळबळ उडाली आहे. आईबद्दल अपशब्द वापरल्याच्या रागातून एका अल्पवयीन मुलाने आपल्या मित्राचा दगडाने ठेचून खून केल्याची घटना समोर आली आहे. या प्रकरणामुळे परिसरात भीतीचे वातावरण निर्माण झाले असून पोलिसांनी अल्पवयीन संशयिताला ताब्यात घेतले आहे.

मिळालेल्या माहितीनुसार, लोकेश ठेंबरे असे मृत्यू झालेल्या तरुणाचे नाव असून तो सध्या घोरपडी मुंढवा परिसरात राहत होता. ही घटना काल रात्री सुमारे १२.३९ वाजण्याच्या सुमारास भाग्यश्री नगर, बी. टी. कवडे रोड, घोरपडी गाव येथील एका मोकळ्या मैदानात घडली. लोकेश आणि अल्पवयीन आरोपी हे दोघे मित्र होते. घटनेच्या वेळी ते मैदानात बसून मद्यपान करत होते.

दरम्यान, नशेत दोघांमध्ये किरकोळ वाद झाला. या वादादरम्यान लोकेश याने आरोपीच्या आईबद्दल शिवीगाळ केल्याचे सांगितले जात आहे. आईचा अपमान सहन न झाल्याने आरोपीचा राग अनावर झाला. संतापाच्या भरात त्याने जवळच पडलेला मोठा दगड उचलून लोकेशच्या डोक्यात जोरात मारला. गंभीर जखमी झालेल्या लोकेशचा घटनास्थळीच मृत्यू झाला.

घटनेची माहिती मिळताच मुंढवा पोलिसांनी तातडीने घटनास्थळी धाव घेत पंचनामा केला. तसेच मृतदेह शवविच्छेदनासाठी रुग्णालयात पाठवण्यात आला. पोलिसांनी संशयित अल्पवयीन मुलाला ताब्यात घेतले असून चौकशीदरम्यान त्याने गुन्ह्याची कबुली दिल्याची माहिती समोर आली आहे. या घटनेमुळे परिसरात मोठी खळबळ उडाली असून, क्षणिक रागातून घडलेल्या या प्रकारामुळे एका तरुणाचा जीव गेला आहे. मुंढवा पोलीस या प्रकरणाचा अधिक तपास करत असून नेमका वाद कशामुळे झाला, याचाही शोध घेतला जात आहे.