Pune News : पुण्यात निर्माणाधीन बांधकामाच्या ढिगाऱ्याखाली ३ कामगार अडकले; एकाचा मृत्यू

सचिन जाधव, साम टीव्ही

Pune : पुण्यात निर्माणाधीन बांधकामाच्या ढिगाऱ्याखाली ३ कामगार अडकल्याची घटना घडली आहे. पुण्यातील सिंहगड रोड, नांदेड सिटीमध्ये बांधकाम सुरु असलेल्या ठिकाणी ढिगाऱ्याखाळी ३ कामगार अडकले आहेत. या घटनेची माहिती मिळताच अग्निशमन दल घटनास्थळी पोहोचले आहेत. या घटनेने इतर कामगारांमध्ये खळबळ उडाली आहे.

मिळालेल्या माहितीनुसार, पुण्यातील नांदेड सिटीमध्ये एका ठिकाणी काम सुरु असताना ३ कामगार मातीच्या ढिगाऱ्याखाली अडकल्याची घटना घडली. या घटनेची माहिती मिळताच पुणे आणि पीएमआरडीएचे अग्निशमन दलाचे जवान घटनास्थळी पोहोचले. तसेच पीडीआरएफचे जवान देखील घटनास्थळी पोहोचले.

पुणे महानगरपालिकेच्या ड्रेनेज लाइनचं काम सुरु असताना ही दुर्दैवी घटना घडली. या कामगारांचे तोंड वर आहे. तर त्यांचं शरीर मातीत अडकलं आहे. या कामगारांना अग्निशमन स्थानिक प्रशासनाच्या मदतीने बाहेर काढण्याचे काम सुरू आहेत. या घटनेत आतापर्यंत एका कामगाराला रेस्क्यू करून बाहेर काढलं आहे. तर दोघांना बाहेर काढण्याचं काम सुरु आहे.

एका कामगाराचा मृत्यू

नांदेड सिटी कंपाऊंड वॉलच्या बाहेरील बाजूस ही घटना घडली. या भागातील ड्रेनेज लाइनचं कामादरम्यान घडलेल्या दुर्घटनेत दोन कामगारांना सुरक्षितपणे बाहेर काढण्यात आलं आहे. तर एका कामगाराच दुर्दैवी मृत्यू झाला आहे. एका कामगाराच्या मृत्यूने त्याच्या सहकाऱ्यांवर दु:खाचा डोंगर कोसळला आहे.