Pune Politics : काँग्रेस पक्षात मानापमान नाट्य, अध्यक्षपदावरून नेत्यांमध्ये नाराजी

सागर आव्हाड, पुणे

काँग्रेस पक्षात सध्या पुण्यातील शहराध्यक्ष पदावरून मानापमानाचे राजकारण रंगताना दिसत आहे. पक्ष संघटना मजबूत करण्याच्या उद्देशाने काँग्रेसने शहरासाठी दोन स्वतंत्र शहराध्यक्षांची नियुक्ती केली असली, तरी या निर्णयामुळे अंतर्गत नाराजी उफाळून आली आहे. पश्चिम भागासाठी माजी आमदार दीप्ती चौधरी यांची, तर पूर्व भागासाठी प्रशांत जगताप यांची शहराध्यक्ष म्हणून निवड करण्यात आली. पक्षाच्या वाढीसाठी आणि स्थानिक पातळीवर संघटन बळकट करण्यासाठी हा निर्णय घेतल्याचे सांगितले जात आहे. मात्र, या दुहेरी नियुक्तीमुळे पक्षात संभ्रमाचे वातावरण निर्माण झाले आहे.

निवड जाहीर झाल्यानंतर लगेचच विद्यमान शहराध्यक्ष अरविंद शिंदे यांनी शहराचा पदभार दीप्ती चौधरी यांच्याकडे सोपवला. मात्र, त्या वेळी प्रशांत जगताप यांनी पदभार स्वीकारला नाही. त्यामुळे या प्रक्रियेबाबत अनेक प्रश्न उपस्थित झाले आहेत. दोन शहराध्यक्ष नेमले असताना एकाच व्यक्तीकडे आधी पदभार देण्याचा निर्णय का घेतला, यावरून राजकीय वर्तुळात चर्चा रंगू लागली आहे.

दरम्यान, आज या दोन्ही नव्या शहराध्यक्षांचा पदग्रहण सोहळा माजी राज्यमंत्री विश्वजीत कदम यांच्या उपस्थितीत होणार आहे. मात्र, या सोहळ्याच्या आधीच निर्माण झालेल्या वादामुळे कार्यक्रमाच्या पार्श्वभूमीवर पक्षातील मतभेद अधोरेखित झाले आहेत. पक्षातील अनेक ज्येष्ठ पदाधिकाऱ्यांनी स्पष्टपणे भूमिका मांडली आहे की, शहरासाठी एकच अध्यक्ष असावा. दुहेरी नेतृत्वामुळे निर्णय प्रक्रियेत अडथळे निर्माण होण्याची शक्यता त्यांनी व्यक्त केली आहे. तर काहींनी या निर्णयाचे समर्थन करत, अंतर्गत वाद टाळण्यासाठीच दोन शहराध्यक्ष नेमल्याचे सांगितले.

तथापि, प्रत्यक्षात मात्र या निर्णयामुळेच पक्षात नाराजी वाढल्याचे दिसून येत आहे. पदभार देण्यापासूनच वादाला सुरुवात झाल्याने काँग्रेससमोर संघटनात्मक आव्हाने अधिक तीव्र होण्याची शक्यता आहे. आगामी काळात पक्ष नेतृत्व या परिस्थितीवर कसे नियंत्रण मिळवते, याकडे सर्वांचे लक्ष लागले आहे.