Pune : पुण्यात ३० वर्षीय विवाहितेची आत्महत्या; राहत्या घरी घेतला गळफास, कारण अस्पष्ट

रोहिदास गडगे, पुणे

पुणे जिल्ह्यातील चाकण परिसरातून एक धक्कादायक घटना समोर आली आहे. महात्मा फुले नगर परिसरात राहणाऱ्या ३० वर्षीय विवाहित महिलेने राहत्या घरात गळफास घेऊन आत्महत्या केल्याची घटना घडली असून परिसरात हळहळ व्यक्त केली जात आहे. या घटनेमुळे स्थानिक नागरिकांमध्ये एकच खळबळ उडाली आहे. मृत महिलेचे नाव चंद्रकला अविनाश जगताप असे असून आत्महत्येमागील नेमके कारण अद्याप स्पष्ट झालेले नाही.

मिळालेल्या माहितीनुसार, चंद्रकला जगताप या आपल्या कुटुंबासह महात्मा फुले नगर परिसरात राहत होत्या. नेहमीप्रमाणे घरातील कामकाज सुरू असताना त्यांनी घरातच फॅनला ओढणीच्या सहाय्याने गळफास घेतला. काही वेळानंतर घरातून आरडाओरड आणि गोंधळाचा आवाज आल्याने शेजारी आणि परिसरातील नागरिकांनी तातडीने घटनास्थळी धाव घेतली.

परिस्थितीचे गांभीर्य लक्षात घेत नागरिकांनी तत्काळ ११२ आपत्कालीन पथक आणि अँब्युलन्सला माहिती दिली. घटनास्थळी पोहोचलेल्या पथकाने महिलेला तातडीने खाली उतरवत उपचारासाठी चाकण ग्रामीण रुग्णालयात दाखल केले. मात्र डॉक्टरांनी तपासणी केल्यानंतर त्यांना मृत घोषित केले.

अचानक घडलेल्या या घटनेमुळे कुटुंबीयांवर दुःखाचा डोंगर कोसळला असून परिसरात शोककळा पसरली आहे. दरम्यान, आत्महत्येमागील नेमके कारण अद्याप समोर आलेले नाही. कौटुंबिक वाद, मानसिक तणाव किंवा इतर कोणत्या कारणामुळे त्यांनी हे टोकाचे पाऊल उचलले का, याचा तपास पोलिसांकडून केला जात आहे. पोलिसांनी घटनास्थळी भेट देत पंचनामा केला असून पुढील तपास सुरू आहे.