Pune : पुण्यातील भाजपच्या बड्या नेत्याचे निधन, राजकीय वर्तुळात शोककळा

सचिन जाधव, पुणे

राजकारणातून मोठी बातमी समोर आली आहे. पुणे महानगरपालिकेचे माजी नगरसेवक तसेच भारतीय जनता पक्षाचे माजी पुणे शहर चिटणीस प्रवीण ऊर्फ विनोद कृष्णराव वस्ते (वय ६३) यांचे अल्पशा आजाराने निधन झाले. त्यांच्या निधनामुळे पुणे शहरातील राजकीय आणि सामाजिक क्षेत्रात हळहळ व्यक्त होत आहे.

प्रवीण वस्ते यांनी २००२ ते २००७ या कालावधीत पुणे महानगरपालिकेत नगरसेवक म्हणून काम केले. त्यांनी लक्ष्मीनगर (पर्वती) परिसराचे प्रतिनिधित्व केले होते. नगरसेवक म्हणून कार्यरत असताना त्यांनी परिसरातील विविध नागरी प्रश्न आणि स्थानिक नागरिकांच्या समस्या मांडण्याचे काम केले. त्यांच्या कार्यकाळात नागरिकांशी सातत्याने संपर्क ठेवून परिसरातील प्रश्न सोडवण्यासाठी त्यांनी प्रयत्न केले.

राजकीय क्षेत्रातही वस्ते यांनी भारतीय जनता पक्षात विविध जबाबदाऱ्या सांभाळल्या. पुणे शहर भाजपचे चिटणीस म्हणून त्यांनी पक्षाच्या संघटनात्मक कामात योगदान दिले. पक्षाच्या माध्यमातून शहरातील विविध उपक्रमांमध्ये त्यांचा सहभाग होता. प्रवीण वस्ते यांच्या पश्चात पत्नी, तीन मुली, जावई, भाऊ, बहीण, वहिनी, पुतणे आणि पुतणी असा परिवार आहे.

पुणे महानगरपालिकेच्या माजी नगरसेविका आणि शहर सुधारणा समितीच्या अध्यक्षा स्मिता वस्ते यांचे प्रवीण वस्ते हे दीर होते. त्यामुळे त्यांचे पुणे महापालिका तसेच शहराच्या राजकीय वर्तुळाशी असलेले संबंधही जवळचे होते. प्रवीण वस्ते यांच्या पार्थिवावर आज सकाळी १० वाजता पुण्यातील वैकुंठ स्मशानभूमीत अंत्यसंस्कार करण्यात येणार आहेत. त्यांच्या अंत्यदर्शनासाठी राजकीय, सामाजिक क्षेत्रातील पदाधिकारी, कार्यकर्ते, मित्रपरिवार तसेच नागरिक उपस्थित राहण्याची शक्यता आहे. वस्ते यांच्या निधनाने त्यांच्या कुटुंबीयांसह मित्रपरिवार आणि सहकाऱ्यांमध्ये शोक व्यक्त केला जात आहे