Maval Kundamala Bridge Collapses : मोठी बातमी! इंद्रायणी नदीवर पूल कोसळला, ६ जणांचा बुडून मृत्यू; मृतांचा आकडा वाढण्याची शक्यता

पुणे : पुण्यातील मावळ तालुक्यात एक धक्कादायक घटना घडली आहे. तळेगाव दाभाडे शहराजवळील प्रसिद्ध पर्यटनस्थळ कुंडमळा येथे इंद्रायणी नदीवर असलेला जूना पूल कोसळून दुर्घटना घडली आहे. आज रविवार असल्यानं पर्यटकांची गर्दी होती. अशातच ही दुर्घटना घटली आणि या घटनेत २० ते २४ पर्यटक बुडाल्याची माहिती मिळाली आहे. तर या दुर्घटनेत ६ जणांचा मृत्यू झाल्याची माहिती आमदार सुनील शेळके यांनी दिली आहे.

घटनेची माहिती मिळाल्यानंतर, स्थानिक पोलीस, ग्रामस्थ आणि आपदा मित्र यांनी घटनास्थळी धाव घेतली असून बचावकार्य सुरु करण्यात आलं आहे. दोन दिवसांपासून मावळ परिसरात मुसळधार पाऊस कोसळत असून इंद्रायणीच्या पाणी पातळीत वाढ झाली आहे. यामुळे नदीत पडलेल्या पर्यटकांना वाचविण्याचे शर्तीचे प्रयत्न यंत्रणांकडून सुरु आहे. मात्र, या दुर्घटनेत ६ जणांचा मृत्यू झाल्याची माहिती समोर आली आहे. आमदार सुनील शेळके यांनी ही माहिती दिली आहे. दरम्यान, या पुलावरून बाईक नेल्यानं त्यावर ओव्हरवेट झाल्यामुळे हा पूल कोसळला असल्याची माहिती समोर आली आहे.