Pune Accident: पुण्यात आयटी इंजिनिअरचं अपघाती निधन, भरधाव कंटेनरने दुचाकीला चिरडलं

• पुण्यात भरधाव डंपरची दुचाकीला धडक

• महंमदवाडीत ही अपघाताची घटना घडली

• आयटी इंजिनिअरचा अपघाती मृत्यू

• डंपरच्या चाकाखाली चिरडून या तरुणाचा मृत्यू

सचिन जाधव, पुणे

पुण्यात भीषण रस्ते अपघातामध्ये आयटी इंजिनिअरचा दुर्दैवी मृत्यू झाला. भरधाव डंपरने दुचाकीला जोरदार धडक दिली. डंपरच्या चाकाखाली चिरडून दोन जण गंभीर झाले. यामधील आयटी इंजिनिअर असलेल्या तरुणाचा जागीच मृत्यू झाला. गंभीर जखमी झालेल्या तरुणावर सध्या रुग्णालयात उपचार सुरू आहेत. ही घटना पुण्याच्या महंमदवाडी येथे घडली. पोलिसांनी डंपर चालकाविरोधात गुन्हा दाखल करत त्याला अटक केली.

मिळालेल्या माहितीनुसार, महंमदवाडी येथील रेहेजा विस्टा परिसरात डंपरने दुचाकीला धडक दिल्याने झालेल्या भीषण अपघातात आयटी इंजिनिअरचा तरुणाचा मृत्यू झाला. तर त्याच्यासोबत असलेला तरुण गंभीर जखमी झाला. २१ सप्टेंबर सायंकाळी ५ वाजताच्या सुमारास हा अपघात झाला. हमजा इब्राहिम सरकार (वय २० वर्षे) असे मृत तरुणाचे नाव होते. तर केस वसीम खान (वय २० वर्षे) हा तरुण गंभीर जखमी झाला आहे. त्याला उपचारासाठी रुग्णालयात दाखल करण्यात आले आहे.

पोलिसांनी अपघातास कारणीभूत ठरलेला डंपर आणि चालक भागण्णा लक्ष्मण कटबू (वय ३४) याच्याविरोधात गुन्हा दाखल करत त्याला अटक केली. हमजा आणि वसीम हे दुचाकीवरून रेहेजा विस्टा परिसरातून जात होते. त्यावेळी त्यांच्या दुचाकीला डंपरने धडक दिली. धडकेनंतर दुचाकी डंपरच्या मागील चाकाखाली गेली. या अपघातात अंगावर डंपरचे चाक गेल्यामुळे आयटी इंजिनिअर हमजाचा रुग्णालयात नेण्यापूर्वीच मृत्यू झाला. या अपघातानंतर स्थानिक नागरिकांनी प्रशासनाला जागे करण्यासाठी रस्तारोको आंदोलन केले.

दरम्यान आज पुणे - सातारा महामार्गावर भीषण अपघात झाला. धांगवडी हद्दीत कारने महामार्गावरून वळण्यासाठी अचानक टर्न घेतला. त्यामुळे पाठीमागून येणारी दुचाकी त्याच्यावर धडकली. या अपघातात दुचाकीवरील तरुण-तरुणी जखमी झाले. भरधाव कारने बेपरवाईपणे अचानक सर्विस रस्त्यावर जाण्यासाठी वळण घेतल्याने दुचाकीस्वाराला कारची थेट धडक बसल्याने हा अपघात झाला. अपघातानंतर जखमींना उपचारासाठी रुग्णालयात दाखल करण्यात आले. दरम्यान हा सर्व प्रकार परिसरातील एका सीसीटीव्ही कॅमेरात कैद झाला.