Accident News : सोलापूर-पुणे महामार्गावर भीषण अपघात! कंटेनरला कारची जोरदार धडक, वाहनांचा चक्काचूर

विश्वभूषण लिमये, सोलापूर

सोलापूर-पुणे महामार्गावर मोडनिंबजवळील सापटणे हद्दीत कंटेनरला पाठीमागून कारने जोरदार धडक दिल्याने भीषण अपघात झाला. या दुर्घटनेत मोहोळ येथील कर्ण पवार या तरुणाचा उपचारादरम्यान मृत्यू झाला, तर अनिकेत धोत्रे आणि रोहित मोरे हे दोघे गंभीर जखमी झाले आहेत. अपघातामुळे महामार्गावर काही काळ वाहतुकीची कोंडी झाली होती.

मिळालेल्या माहितीनुसार, मोडनिंबजवळील सापटणे हद्दीत एचपी पेट्रोल पंपाजवळ हा अपघात घडला. कारने समोरून जाणाऱ्या कंटेनरला पाठीमागून जोरदार धडक दिली. धडकेची तीव्रता एवढी होती की, कारचा पुढील भाग अक्षरशः चक्काचूर झाला. अपघातानंतर कार कंटेनरखाली अडकल्याने त्यामधील तिन्ही जण अडकून पडले होते.

अपघाताची माहिती मिळताच बचाव पथकाने घटनास्थळी धाव घेतली. क्रेनच्या साहाय्याने अपघातग्रस्त जीप बाहेर काढण्याचे काम करण्यात आले. त्यानंतर कारचे दरवाजे तोडून तिन्ही जखमींना बाहेर काढण्यात आले. गंभीर जखमी अवस्थेतील तिघांनाही तातडीने उपचारासाठी रुग्णालयात दाखल करण्यात आले. या अपघातात कर्ण पवारच्या डोक्याला गंभीर दुखापत झाली होती. त्याच्यावर रुग्णालयात उपचार सुरू असताना त्याचा मृत्यू झाला.

दरम्यान, अनिकेत लक्ष्मण धोत्रे आणि रोहित विजय मोरे यांच्यावर उपचार सुरू असून त्यांची प्रकृती गंभीर असल्याची माहिती समोर आली आहे. दरम्यान, या भीषण अपघातामुळे परिसरात हळहळ व्यक्त होत आहे. महामार्गावर वेगाने होणारी वाहतूक आणि अवजड वाहनांमुळे अपघाताचा धोका वाढत असल्याने वाहनचालकांनी काळजीपूर्वक वाहन चालवण्याचे आवाहन करण्यात येत आहे. या प्रकरणाचा पुढील तपास सोलापूर ग्रामीण पोलीस करत आहेत. अपघात नेमका कोणत्या कारणामुळे झाला, याबाबत पोलिसांकडून अधिक तपास सुरू आहे.