आता पाळीव कुत्र्यांचीही दहशत; पाळीव कुत्र्यांसाठीही नियमावलीची गरज

राज्यात भटक्या कुत्र्यांच्या हल्ल्यांमध्ये वाढ होत असतानाच आता पाळीव कुत्र्यामुळेही नागरिकांमध्ये भीती पसरलीय. अशा एका पाळीव कुत्र्यानं हैदोस घातलाय. यामुळे मात्र मालकाला जेलची हवा खावी लागू शकते. कुठला आहे हा पाळीव कुत्रा? आणि नेमका किती जणांवर या कुत्र्यानं हल्ला केलाय? पाहूयात हा रिपोर्ट.

विविध शहरांत सध्या भटक्या कुत्र्यांच्या वाढत्या हल्ल्यांमुळे नागरिक दहशतीत आहेत. त्यात आता पाळीव कुत्र्यांचीही दहशत वाढत चाललीय. पुण्याच्या पर्वती परिसरात एका पाळीव कुत्र्यानं हल्ला करत अनेक नागरिकांना चावा घेतल्याचं समोर आलंय. या प्रकरणी एका 30 वर्षीय तरुणानं थेट पोलीस ठाण्यात तक्रार नोंदवलीये.

क्षीरसागर कुटुंबानं गेल्या सहा वर्षांपासून 'शराबी' नावाचं पांढऱ्या रंगाचं कुत्रं पाळलंय. हे कुत्रं परिसरातील रस्त्यावरून ये-जा करणाऱ्या नागरिकांवर हल्ला करून त्यांना चावत असल्याच्या अनेक तक्रारी करण्यात आल्या. रहिवाशांनी अनेकदा संबंधित कुटुंबीयांना कुत्र्यावर नियंत्रण ठेवण्याची विनंती केली. मात्र, क्षीरसागर कुटुंबानं याकडे दुर्लक्ष केल्याचा आरोप तक्रारीत करण्यात आलाय. या कुत्र्याने आतापर्यंत 10 ते 12 जणांना चावा घेतल्याचा दावा तक्रारदाराने केलाय.

विशेष म्हणजे, पाळीव कुत्र्यामुळे नागरिकांना दुखापती होत असतानाही आवश्यक खबरदारी न घेतल्याप्रकरणी क्षीरसागर कुटुंबाविरोधात पर्वती पोलीस ठाण्यात गुन्हा दाखल करण्यात आलाय. पाळीव प्राणी पाळणं, हा ज्याचा त्याचा वैयक्तिक प्रश्न असला तरी त्यामुळे परिसरातील नागरिकांना त्याचा त्रास होणार नाही, याची जबाबदारी मालकाचीच असते. नुकतंच सर्वोच्च न्यायालयानं भटक्या कुत्र्यांसंदर्भात देशातील सर्व राज्य सरकारांना महत्त्वाचे निर्देश दिलेत. मात्र, असं असताना आता पाळीव कुत्र्यावरून नागरिकांच्या जीवाला धोका निर्माण होत असेल तर याबाबत कडक नियमावली तयारी करण्याची गरज आहे.