टिटवाळा स्थानकात प्रवाशांचा संयम तुटला, लोकल लेट धावत असल्याने ट्रॅकवर उतरत केला रेल रोको

ठाणे : लोकल ट्रेन उशीरा धावत असल्याने टिटावाळा रेल्वे स्थानकात संतप्त प्रवाशांनी रेल रोको केला. लोकल उशीरा धावत असल्याने रेल्वे प्रवाशांनी रेल्वे ट्रॅकवर उतरुन आंदोलन केलं. मुंबईच्या दिशेने जाणारी प्रत्येक लोकल उशिराने धावत असल्याने प्रवाशांचा उद्रेक झाला आहे. (Latest Marathi News)

कसारा-सीएसएमटी लोकल (Mumbai Local) जी टिटवाळा स्थानकात ८.१९ वाजताची आहे, ही लोकल रोजच उशीरा येत असते. यामुळे प्रवाशांना आपल्या ऑफिसमध्ये पोहोचण्यास उशीर होतो. तसेच लोकल उशीरा असल्याने रेल्वे स्टेशनवर प्रवाशांची गर्दीही वाढते. या रोजच्या त्रासाला कंटाळून अखेर आज प्रवासी आक्रमक झाले.

आज देखील ही लोकल उशारा असल्याने प्रवाशांनी थेट रेल्वे ट्रॅकवर उतरण्याचा निर्णय घेतला. जवळपास 15 मिनिटे प्रवाशांनी रेल्वे रोखून धरली. मात्र पोलिसांनी मध्यस्थी करत प्रवाशांना रेल्वे मार्गावरुन हटवले. त्यानंतर लोकल सीएसएमटीच्या दिशेने रवाना झाली.