Jayant Patil on Congress Opposition Leader : संख्याबळ पाहता काँग्रेसचा विरोधी पक्षनेता होणे शक्य, जयंत पाटलांचं वक्तव्य

Mumbai News : राष्ट्रवादी काँग्रेसमधील फुटीनंतर शरद पवार आणि अजित पवार यांच्याकडे किती आमदार आहेत, याचा अधिकृत आकडा अजून समोर आलेला नाही. मात्र दोन्ही गटाकडून आमच्याचकडे जास्त आमदार असल्याचे दावे केले जात आहे. मात्र जयंत पाटलांच्या एका वक्तव्याने अजित पवारांसोबत सर्वाधिक आमदार असल्याचं स्पष्ट होत आहे.

राज्याच्या विरोधी पक्षनेते पदावर काँग्रेस दावा करणार आहे. याबाबत बोलताना जयंत पाटील यांनी म्हटलं की, संख्याबळ पाहता काँग्रेस पक्षाचा विरोधी पक्षनेता होणे शक्य आहे. लवकरच आम्ही त्याबाबतही आमच्या सहकारी पक्षासोबत चर्चा करू व निर्णय घेऊ.

खातेवाटपाबाबत अद्याप एकमत नाही

शपथविधी झाल्यानंतर त्याच दिवशी खाते वाटप होतात, असा आतापर्यंतचा प्रघात आहे. मात्र अद्यापही सत्तेत आलेल्या नव्या सहकाऱ्यांचं खातेवाटप झालेलं नाही. त्यामुळे नव्या सहकाऱ्यांसोबत सत्ताधाऱ्यांचे अद्याप एकमत नाही असे दिसते, अशी टीका राष्ट्रवादी काँग्रेस पक्षाचे (शरद पवार गट) प्रदेशाध्यक्ष जयंत पाटील यांनी सत्ताधाऱ्यांवर केली.  (Latest Marathi News)

राज्यात अभूतपूर्व राजकीय नाट्यानंतर अद्यापही राज्याचा प्रशासकीय कारभार सुरळीतपणे सुरू झालेला नाही. या पार्श्वभूमीवर बोलताना जयंत पाटील म्हणाले की, नुकत्याच झालेल्या शपथविधीनंतर राज्यात अभूतपूर्व परिस्थिती निर्माण झाली आहे. सरकारने नवे सहकारी घेतले मात्र शपथविधीनंतर अद्यापही खातेवाटप झालेला नाही. अनेक जिल्ह्यांना पालकमंत्री नसल्याने प्रशासन ठप्प झाले आहे. या परिस्थितीकडे लक्ष देऊन सरकारने लवकरात लवकर निर्णय घ्यावा व राज्याचा कारभार सुरू करावा. (Breaking Marathi News)

नाराज असतील त्यांनी भूमिका मांडावी

नव्या आलेल्या सहकाऱ्यांमुळे सत्ताधारी पक्षातील अनेक आमदार व अपक्ष आमदार नाराज असल्याचा प्रश्न विचारला असता ते म्हणाले की, कोणाचं काय ठरले आहे हे माहिती नाही. जे नाराज असतील त्यांनी पुढे येऊन आपली भूमिका व्यक्त करावी. अन्याय होत असेल तर त्यांनी तो जनतेसमोर मांडावा.