नवी मुंबईत मॅनेजरवर हल्ला, छातीवर तलवारीने सपासप वार, CCTV मध्ये धक्कादायक घटना कैद

विकास मिरगणे, साम टीव्ही प्रतिनिधी

Kamothe Hotel Attack : जेवणाच्या बिलावरून हॉटेल मॅनेजर आणि ग्राहकामध्ये जोरदार वाद झाला. हाच वाद डोक्यात ठेऊन दुसऱ्या दिवशी त्या व्यक्तीने हॉटेलमध्ये घुसून मॅनेजरवर तलवारीने सपासप वार केले. तलवारीने मॅनेजरच्या छातीवर आणि अंगावर वार केले. त्यानंतर कॅश काऊंटरवरही आदळाआपट केली. ही धक्कादायक घटना सीसीटीव्हीमध्ये कैद झाली. या प्रकरणी कामोठे पोलिसांनी गुन्हा दाखल केला असून तपास केला जात आहे. या हल्ल्यात हॉटेल मॅनेजर गंभीर जखमी झाला असून त्याच्यावर जवळच्या रूग्णालयात उपचार सुरू आहेत.

नवी मुंबईतील कामोठे येथील हॉटेलमध्ये घुसून त्या तरुणाने तलवारीने हल्ला केल्याची घटना सीसीटीव्हीमध्ये कैद झाली. कामोठे सेक्टर-६ मधील मानसरोवर हॉटेलमध्ये मंगळवारी रात्री सुमारे सव्वा आठच्या सुमारास थरारक घटना घडली. यावेळी रस्त्यावर मोठ्या प्रमाणात वर्दळ होतीच, त्याशिवाय हॉटेलमध्येही ग्राहकांची गर्दी जास्त होती. सर्वजण टेबलवर जेवणाचा आनंद घेत होते. हॉटेलचे कर्मचारी ऑर्डर घेत होते. पण त्याचवेळी तरूण घुसला अन् राडा घातला.

मिळालेल्या माहितीनुसार, आरोपी तरुण तलवार घेऊन हॉटेलमध्ये घुसला होता. त्याने हॉटेल मॅनेजर उमेश शेट्टी यांच्या छातीवर वार केला. त्यानंतर त्याने काउंटरवरही ताबडतोब हल्ला चढवला. या अचानक झालेल्या हल्ल्यामुळे हॉटेलमध्ये एकच गोंधळ उडाला. उपस्थित ग्राहकांनी जीव वाचवण्यासाठी धावाधाव करत पळ काढला. संपूर्ण घटना सीसीटीव्ही कॅमेऱ्यात कैद झाली आहे. हा व्हिडिओ कामोठ्यात सोशल मीडियावर व्हायरल झाला आहे.

मिळालेल्या माहितीनुसार, एक दिवस आधी झालेल्या वादाचा बदला घेण्यासाठी हा हल्ला करण्यात आल्याचे सांगितले जात आहे. सध्या पोलिस या प्रकरणाचा तपास करत असून आरोपीचा शोध सुरू आहे. या घटनेमुळे कामोठे परिसरात भीतीचे वातावरण पसरले आहे. तरूणाने हल्ला बिलामुळेच केला का? या हल्ल्यामागे दुसरे काही कारण होतं? याचा तपास कामोठे पोलिसांकडून करण्यात येत आहे. सायंकाळची वेळ असल्यामुळे हॉटेलमध्ये मोठ्या प्रमाणात गर्दी होती. त्यावेळी ही थरारक घटना घडल्याने एकच खळबळ उडाली.